Vashıngtondyq oqýshylar AQSh-taǵy Qazaqstan elshiligin aralady

Qazaqstan – amerıkalyq balalar kózimen. Vashıngtondyq 5-synyp oqýshylary AQSh-taǵy Qazaqstan elshiligin aralady, dep habarlaıdy Habar24. Aldymen mundaǵy 1888 jyly salynǵan Sherman Haýs atty ǵımaratynda boldy. Odan keıin Qazaqstan týraly beınerolık kórip, el týraly áńgimege qulaq túrdi. Bul shara ózge elderdiń elshilikterin aralaý arqyly mádenıetimen tanystyratyn Embassy Adoption Program baǵdarlamasy aıasynda ótkizilip otyr. Qazaqstan elshiligi de AQSh astanasyndaǵy bilim berý mekemeleriniń baǵdarlamasyndaǵy osy bir jańashyldyqqa qosylǵan. "Maǵan elshiliktiń ǵımaraty unaıdy. Men buryn-sońdy mundaı ádemi keńseni kórmeppin. Muǵalimimiz Stefanı Tompson hanym bizge Qazaqstan týraly kóp nárse aıtty. Synyptaǵy oqýshylarǵa Qazaqstandaǵy ádemi jerlerdiń sýretin de kórsetti," - deıdi Leckie Elementary School bastaýysh mektebiniń besinshi synyp oqýshysy Kendra. "Embassy Adoption Program baǵdarlamasynyń ashylǵanyna 42 jyl boldy. Baǵdarlama aıasynda Vashıngtondaǵy dıplomatııalyq mıssııalar synyptar arasynda bólip beriledi de, oqý jyly barysynda oqýshylardyń sol dıpmıssııa tıesili el týraly baıandaýshy túrli tanymdyq sharalar ótkiziledi. Bıyl baǵdarlamaǵa 79 elshilik qatysyp otyr. Bul meılinshe joǵary kórsetkish sanalady. 5 pen 6-synyp oqýshylarynyń ózge elderdi tanyp-bilýin baqylaý biz úshin úlken ǵanıbet. Búgin biz Qazaqstanmen jaqynyraq tanystyq jáne sizderge qonaqjaılylyq úshin alǵys aıtqym keledi," - deıdi «Vashıngton oryndaýshylyq óner ortalyǵynyń» aǵartý isi jóninen menedjeri Trısha Teılor.