Astanadaǵy Nazarbaev Ýnıversıtette Táýelsizdiktiń 25 jyldyǵy jáne Qazaqstan Respýblıkasy men Qytaı Halyq Respýblıkasy arasynda dıplomatııalyq qatynastardyń ornaǵanyna shırek ǵasyr tolýyna, sondaı-aq, «Uly Jibek jolynyń ekonomıkalyq beldeýi» bastamasynyń 3 jyldyǵyna arnalǵan Qazaqstandaǵy alǵashqy «Islam mádenıeti jáne Uly Jibek jolynyń turmysy» – fotoóner sheberleriniń úzdik týyndylary» atty halyqaralyq fotosýret kórmesi uıymdastyryldy.
2013 jyldyń qyrkúıek aıynda osy ýnıversıtette bolǵan kezdesýde Qytaı Halyq Respýblıkasy tarapynan «Uly Jibek jolynyń ekonomıkalyq beldeýi» birlesken jobasyn bastaý jónindegi bastama kóterilip, ol Qazaqstan tarapynan qoldaý tapqan bolatyn. Sodan beri bul bastamaǵa 100-den astam el men halyqaralyq uıym atsalysyp otyr. Al Jibek Joly Qytaı elinen bastaý alǵany belgili. Uly Jibek joly saýda-sattyqtyń negizi bola otyryp, bul kerýen arqyly birneshe elder men ulystardyń mádenıeti de bir-birine keńinen yqpal etti. Búgingi Qytaı memlekettik óner qory muryndyq bolyp otyrǵan is-sharaǵa 65 eldiń fotosheberleriniń týyndylary iriktele kelip, solardyń ishinen eń óreli 200 óner týyndysy kórmege qoıylypty.
Qazaqstan dúngenderiniń qaýymdastyǵy men Qytaı Halyq Respýblıkasynyń Qazaqstan Respýblıkasyndaǵy elshiliginiń qoldaýymen ótkizilip otyrǵan kórmede Qytaı, Saýd Arabııasy, Bahreın, Oman, Mysyr, Birikken Arab Ámirlikteri, Bangladesh, Vetnam sııaqty birneshe álem elderinen belgili fotosýretshilerdiń týyndylary usynylǵan. Fotolar Uly Jibek joly boıynda ornalasqan elderdiń mádenıetin, salt-dástúrin, adamı bolmysy men turmys-tirshiliktiń san qyrly salasyn qamtyp, ıslam mádenıetiniń alýan qyryn talǵampazdyqpen kórsete bilgen. Olar Uly Jibek joly elderindegi tirshiliktiń kóp qyrly álemin pash etedi.
Berik SADYR,
«Egemen Qazaqstan»
Sýretterdi túsirgen
Erlan OMAROV,
«Egemen Qazaqstan»
