Sábıler sándi ǵımaratta tárbıelenedi

Ulytaý aýdanyna qarasty Jezdi kentindegi «Aıgólek» balabaq­shasy munda keletin sábı­ler sanynyń kúrt ósýinen ǵımarat tapshylyǵyn kórip júr edi. Osy máseleni sheshý úshin ótken jyly respýblıkalyq bıýdjetten osy eldi mekendegi eski qonaq úıdi kúrdeli jóndeýden ótkizýge 80 mıllıon teńge qarajat bólinip, merdiger «Olja KZ» JShS iske kiristi. Qurylys fırmasy degeninde turyp, eski qonaqjaıdy adam tanymastaı ádemi etip jóndep, ásem de jı­naqy balabaqsha ǵımaratyn el Táýelsizdigi merekesi qarsańynda paıdalanýǵa berdi. Qos qabatty, jalpy aýmaǵy 650 sharshy metr bolatyn jańa balabaqsha ǵımaraty 75 balaǵa arnalǵan. Úsh topta tárbıelenetin sábılerge arnalyp jabdyqtalǵan mýzyka zaly, oıyn alańdary, sporttyq kort jumys isteıdi. Balabaqshanyń barlyq bólmeleri otandyq óndiristiń tamasha jıhazdarymen, basqa da kerek-jaraqtarmen tolyq qamtamasyz etilgen. Mekeme derbes jylý júıesimen jylytylady. Jańa ǵımarattyń aýlasynda da arnaıy sport, oıyn alańqaılary bar. Balabaqshada qazir 18 pedagog eńbek etýde. Olardyń bári de tıisinshe biliktiligin arttyrý kýrstarynan ótken. Balǵyndarǵa sabaq zamanaýı baǵdarlamalar boıynsha qazaq, orys jáne aǵylshyn tilderinde júrgiziledi. «Aıgólek» balabaqshasynyń jańa ǵımaraty balalar men ata-analardyń qýanyshyna aınalýmen qatar, Jezdi kentiniń de shyraıyn kel­tirip tur. Qaırat ÁBILDINOV, «Egemen Qazaqstan» Qaraǵandy oblysy, Ulytaý aýdany