Qazaqstanǵa keletin árbir týrıstiń ekinshisi Almatyǵa soqpaı ketpeıdi desek te, Ýnıversıada kúnderinde elge kelgen qonaqtardyń árbir kúnin áserli ete alatyndaı ońtústik shaharda qandaı kórikti oryndar bar? Alysyn aıtpaǵanda, ulan-baıtaq Qazaqstannyń ár shalǵaıynan stýdenttik alamandy tamashalaýǵa keletin otandastarymyzdyń sany qanshalyqty bolady? Bul – qazir aldaǵy kúnderi ótetin jarystardyń jarty máselesi.
О́tken aptada Almatyda Ýnıversıada 2017 nysandaryna týrıstik naryqqa qatysyp otyrǵan kompanııalardyń ókilderi úshin aqparattyq saıahat uıymdastyryldy.
Mereke qarsańyndaǵy mańyzdy sharaǵa Dúnıejúzilik qysqy Ýnıversıada 2017 dıreksııasy Qazaqstan týrıstik qaýymdastyǵyn tartty.
Aqparattyq saıahat Dúnıejúzilik qysqy Ýnıversıada jarystary ótetin «Shymbulaq» taý shańǵysy kýrortyn, «Medeý» sport keshenin, «Suńqar» halyqaralyq shańǵy tramplınder keshenin, Balýan Sholaq atyndaǵy Sport jáne mádenıet saraıyn, «Alataý» shańǵy jáne bıatlon keshenin, «Tabaǵan» sport-oıyn-saýyq keshenin, «Almaty Arena», «Halyq Arena» sııaqty 8 nysandy qamtydy.
Bul shara elimizde týrıstik ahýal ornatyp otyrǵan naryq oıynshylary árbir nysandy kórip, qandaı týrıstik qyzmet usyna alatynyn eksheýge septeseri anyq.
Qazaqstan týrıstik assosıasııasynyń prezıdenti Rashıda Shaıkenovanyń aıtýynsha, Ýnıversıada kúnderinde Almatyǵa syrttan keletin sheteldik týrısterden bólek, elimizdiń túkpir-túkpirinen keletin qonaqtar qatary da kóbeıedi. Osyǵan oraı, týrıstik agenttikter sporttyq nysandardy Almaty qalasy men oblysy boıynsha ekskýrsııalyq týrlarǵa qosady. Qazirdiń ózinde Ýnıversıada nysandaryn aralap shyǵýǵa arnalǵan «Sporttyq Almaty» atty ekskýrsııalyq týr jasalǵan.
Aınash ESALI,
«Egemen Qazaqstan»
ALMATY
