Lıvııadan jetken jańalyq munaı baǵasyna keri áser etti

Lıvııanyń eń iri ken oryndarynyń biri Shararada júrgizilip jatqan jańartý jumystary munaı baǵasyn arzandatyp jiberdi, dep habarlaıdy Reuters agenttigi. Nátıjesinde búgin Astana ýaqytymen saǵat 09:00 shamasynda Brent markaly qara altyn quny barreline 54,65 dollarǵa saýdalandy. Al keshe keshki sessııada munaı baǵasy 55,60 dollarǵa deıin jetken edi. Oǵan qosa 21 jeltoqsan kúni AQSh munaı qory týraly málimet jańartylyp, eldegi shıkizat qory kúrt kóterilgeni aıtyldy. Osy faktordyń da qara altynnyń arzandaýyna alǵyshart bolǵanyn alǵa tartady mamandar. Keshe Lıvııa munaı korporasııasy (NOC) eldiń eń iri eki ken orny Sharara men ál-Fılge tartylǵan munaı qubyrlarynyń jumys istemeı turǵanyn habarlaǵan bolatyn. Jeltoqsannyń ortasynda osy ken oryndaryna tartylǵan qubyrlardy jaýyp tastaǵan Petroleum Facilities Guard toby bılikpen kelisimge kelip, qubyrdy qaıta ashýǵa kelisken. Shararany ıgerip jatqan kompanııalardyń qatarynda NOC-tan basqa Statoil, Total jáne Repsol kompanııalary bar. Al ál-Fıl ken orny jartylaı Eni kompanııasyna tıesili. Sarapshylardyń aıtýynsha, Lıvııa munaı óndirisi aldaǵy úsh aıda táýligine 270 myń barrelge kóbeıýi yqtımal. Búginde Lıvııa táýligine 600 myń barrel óndirýde. Jyl sońyna deıin bul kórsetkishti 900 myń barrelge kóbeıtip, 2017 jyly táýligine 1,1 mln barrelge jetkizýdi kózdep otyr.