Baýyrjan Báıbek Tashkent qalasynyń ákimimen kezdesti

Almatyda ótken kezdesýde baýyrlas eki halyqtyń, taǵdyrlas eki qalanyń atynan sóz sóılegen shahar basshylary tarıhı baılanystardyń eki arada buǵan deıin de eshqashan úzilmegenin tilge tıek etti. Onyń aıqyn kýási – qazirgi tańda Almatyda 129 birikken, 236 ózbek kásiporyndary qarqyndy jumys istep keledi. Almaty qalasynyń ákimi Baýyrjan Baıbek ótken jyldyń 10 aıymen salystyrǵanda aradaǵy taýar aınalymy 62 paıyzǵa ósip, 200 mılıon AQSh dollaryn quraǵanyn da eske salýdy umytpady. Bıznes pen jeke kapıtaldyń negizgi bóligi, bankterdiń bas keńseleriniń 90 paıyzy osy Almatyda ornalasqanyn alǵa tarta sóılegen ákim munda «kelem deýshi» barsha ınvestorlarǵa esiktiń aıqara ashyq ekenin, sondaı-aq ózderin Tashkent pen jalpy О́zbekstannyń týrıstik klasteriniń damýy qyzyqtyryp otyrǵanyn aıtyp ótti. О́z kezeginde Tashkent qalasynyń hákimi Rahmonbek Ýsmanov bul saparynda, ásirese Almatynyń «Qoljetimdi baspana-2020» memlekettik jobasyna erekshe nazar aýdara kelgenin jarııa etti. «Bizdiń Tashkent úshin bul joba óte kókeıtesti másele ekenin aıtar edim. Sondyqtan da biz bolashaqta osy baǵdarlamanyń is-tetikterin ózimizdiń tájirıbemizde paıdalansaq degen nıettemiz», – dedi Rahmonbek Ýsmanov. Kezdesý barysynda Almatyda ótetin 28-shi Álemdik Qysqy «Ýnıversıada-2017» oıyndaryna ózbek sportshylarynyń da qatysatyndyqtary málim boldy. Talǵat SÚIINBAI, «Egemen Qazaqstan»