Túımebaev Shymkent qalasynyń áýejaıyn retke keltirýdi tapsyrdy

Ońtústik Qazaqstan oblysynyń ákimi Janseıit Túımebaev Shymkentti aralap, shahardy abattandyrý jumystary boıynsha qalanyń basshylyq quramymen kóshpeli keńes ótkizdi, dep habarlady oblys ákimdiginiń baspasóz qyzmeti. Oblys basshysy Shymkent áýejaıyn aralap, áýejaı mańyndaǵy kólik turaǵy men abattandyrýdy álemdik standarttarǵa saı etýdi tapsyrdy. Eń basty másele tazalyq pen tártip ekenin eskertti. «Qalamyzǵa keletin sheteldik qonaqtar sany jyl sanap artyp keledi. Sondyqtan birinshi kezekte áýejaıymyzdy retke keltirýimiz qajet. Mundaǵy kólik turaqtary men abattandyrý jumystaryn álemdik standartqa saı etip jasaýǵa tıispiz», – dedi Janseıit Qanseıituly. Oblys ákiminiń erekshe kóńil bólgen máselesi – jer telimderi. Bul salada júıesizdik pen zańsyzdyq kóp oryn alǵandyqtan atalǵan jaıt tııanaqty zerdeleýdi qajet etedi. Qalanyń bas josparyna saı endi jer telimderi jeke sektordaǵy úı qurylysyna emes, eńseli kópqabatty turǵyn úı keshenderin salý úshin berilmek. Oblys ákimi shahardyń jańa bet-beınesin naqtylaýdy tapsyrdy. Sondaı-aq, aımaq basshysy Qaınarbulaq saıajaıyna barar jol boıyndaǵy saı-salalaryn kógaldandyrý jumystarynyń jobasymen tanysty. Qala ishindegi aýmaǵy 600 gektar úsh birdeı tabıǵı saı-salalar keleshekte saıaly saıabaqtarǵa aınalýy tıis. Bul biregeı joba qurylysy kóktemde qarqyn alýy qajet. Saılarda ornalasatyn demalys oryndarynda balalar oıyn alańshalary men sport alańdary, shaǵyn arhıtektýralyq keskinder, oryndyqtar, jol shamdary ornatylyp, aǵash kóshetteri otyrǵyzylady. Ákim sondaı-aq, ákimshilik iskerlik ortalyǵy, Astana dańǵyly, U.Arǵynbekov kóshelerindegi kógaldandyrý jumystaryn da nazardan tys qaldyrǵan joq. Qalany aralaý barysynda tıisti qurylym jetekshilerine tapsyrmalar berilip, qysqa merzimde nətıjege qol jetkizilý mindetteldi.