Dástúr men jańashyldyq jarshysy

Ál-Farabı atyndaǵy Qazaq ulttyq ýnıversıtetiniń  uıymdastyrýymen Qazaq radıosynyń 95 jyldyǵy, «Shalqar» radıosynyń 50 jyldyǵy jáne jýrnalıstıka fakýltetiniń stýdenttik «Sana – ál-Farabı» radıosynyń 20 jyldyǵyna arnalǵan respýblıkalyq ǵylymı-tájirıbelik konferensııa ótti. Memlekettik múdde men ult­­tyq muratqa, jalpy adam­zat­tyq qundylyqtarǵa baǵat berýde elektrondy  BAQ ishinde radıo­nyń orny bólek. Eń alǵash­qy habaryn Qazaqstannyń tuńǵysh astanasy Orynbor (Re­seı) qalasynan taratýdan bas­taǵan Qazaq radıosy osynaý ótken jyldar ishinde damý joldarynyń barlyq satysynan ótti. Búgingi Qazaq radıosy 9 tilde, aptasyna 148 habar daı­yndaıdy. 2011 jyldyń 18 shil­desinen bastap toqtaýsyz on­laın-translıasııa júrgizip keledi. Sol sekildi 1966 jyldyń 1 qańtarynan úzbeı áýe tolqynyna shyǵyp, habar taratyp, ulttyq sazben tyńdarmanyn terbetip kele jatqan «Shalqar» radıosynyń baǵdarlamasyn búginde  álemniń ár túkpirinen-aq tyńdaýǵa bolady. Eki radıo da ýnıversıtet aýdıtorııasynda bolashaqtyń bilikti mamandaryn – radıojýrnalısterin daıyndaýda eleýli úles qosyp otyr. Ataqty oqý ornyndaǵy «Sana – ál-Farabı» radıosy osynaý kásibı baılanystyń jarqyn kórinisi ispetti. Tartymdy ótken basqosýdan soń «Qazaqstan» RTRK AQ bas­­qarma tóraǵasy Kemelbek Oıshy­baev qazaq radıosynyń bir top ardagerine syı-sııapat kórsetti. Sondaı-aq, radıo qyz­metindegi jeńimpaz stýdentterge arnaýly shákirtaqylar tabystady. «Eń úzdik stýdenttik radıo­baǵ­dar­lamasy» atalymy boıynsha jeti stýdent aqshalaı syılyq aldy. Konferensııaǵa Qazaq radıosy men «Shalqar» radıosynyń ardagerleri, buqaralyq kommýnıkasııa salasyn zertteýshi ǵalym­dar, qazaqstandyq elektrondy BAQ ókilderi, jýrnalıstıka fakýltetiniń stýdentteri men magıstranttary, doktoranttary qatysty. Qyzyqty ótken ǵylymı jıynda atalǵan máselelerdiń aıasynda aıtylǵan usynystar men barlyq kepildemeler jınaq túrinde jaryq kóredi. Talǵat SÚIINBAI, «Egemen Qazaqstan» ALMATY