QR qorǵanys jáne aeroǵarysh ónerkásibi vıse-mınıstri taǵaıyndaldy

Vedomstvoda habarlaǵandaı, bul laýazymynda M. Nurǵojın Qazaqstan Respýblıkasy ǵarysh qyzmetiniń damý máselelerine jetekshilik etetin bolady. Marat Nurǵojın 1957 jyly 30 maýsym kúni dúnıege kelgen. 1980 jyly N.E. Baýman atyndaǵy Máskeý joǵary tehnıkalyq ýchılıshesin úzdik bitirgen, tehnıkalyq ǵylymdar doktory, professor. Eńbek jolyn Qaraǵandy polıtehnıkalyq ınstıtýtynda bastap, onda kishi ǵylymı qyzmetkerden birinshi prorektorǵa deıin ósken. 2004 jyldyń naýryz aıynda Qazaqstan Respýblıkasy Ǵylym jáne bilim mınıstrliginiń departament dırektory laýazymyna taǵaıyndaldy. Túrli jyldary apparat basshysy, QR BǴM Aeroǵarysh komıtetiniń tóraǵasy, «Samǵaý» Ulttyq ǵylymı-tehnologııalyq holdıng» AQ basqarma tóraǵasynyń orynbasary, basqarma múshesi sekildi laýazymdaryn atqarǵan. 2008 jyly «Qazaqstan Ǵarysh Sapary» ulttyq kompanııasy» AQ birinshi vıse-prezıdenti, 2013 jyldyń tamyzynda – «Qazaqstan Ǵarysh Sapary» UK» AQ Prezıdentiniń mindetin atqarýshy laýazymyna taǵaıyndaldy. M. Nurǵojın belsendi ǵalym, 250-den astam ǵylymı jáne ǵylymı-ádistemelik jumystyń, monografııanyń, oqýlyqtyń jáne oqý ádistemeniń, patenttiń, avtorlyq kýáliktiń jáne zııatkerlik menshik týraly kýáliktiń avtory. QR Qorǵanys jáne aeroǵarysh ónerkásibi vıse-mınıstri bolyp taǵaıyndalýyna deıin M. Nurǵojın «Qazaqstan Ǵarysh Sapary» UK» AQ Prezıdenti laýazymyn atqardy. Qazaqstan Respýblıkasynyń memlekettik nagradalarymen: «Kurmet» ordenimen, Qazaqstan Respýblıkasy Prezıdentiniń Alǵys hatymen, mereıtoılyq medaldarmen, «Qazaqstan Respýblıkasy bilim berý isiniń qurmetti qyzmetkeri» jáne «Qazaqstan Respýblıkasy ǵylymyn damytýdaǵy jetistikteri úshin» tósbelgilermen marapattalǵan. Esterińizge sala keteıik, Qazaqstan Respýblıkasynyń Qorǵanys jáne aeroǵarysh ónerkásibi mınıstrligi Qazaqstan Respýblıkasy Prezıdentiniń 2016 jylǵy 6 qazandaǵy № 350 Jarlyǵyna sáıkes quryldy. Osy kúnge deıin QR Qorǵanys jáne aeroǵarysh ónerkásibi vıse-mınıstrleri laýazymdaryna aqparattandyrý jáne baılanys salasyndaǵy aqparattyq qaýipsizdik (kıberqaýipsizdik) máselelerine jetekshilik etetin Golobýrda Dmıtrıı Vasılevıch (Qazaqstan Respýblıkasy Úkimetiniń 2016 jylǵy 14 qarashadaǵy № 702 Qaýlysy) jáne jumyldyrý daıarlyǵy men jumyldyrý, memlekettik materıaldyq rezervti qalyptastyrý men damytý, biryńǵaı áskerı-tehnıkalyq saıasatty júrgizý, qorǵanystyq tapsyrysty qalyptastyrý, ornalastyrý men oryndaý máselelerine jetekshilik etetin Ramazanov Arman Qaıyrbekuly (Qazaqstan Respýblıkasy Úkimetiniń 2016 jylǵy 18 qarashadaǵy № 707 Qaýlysy) taǵaıyndaldy.