Astanada jańajyldyq shańǵy jarysy ótip jatyr

El Táýelsizdiginiń 25 jyldyǵy qurmetine elordada «Astana ormany» jasyl beldeýiniń «Jol-soqpaq jelisi» velojolynyń bazasynda jańajyldyq shańǵy jarysynyń saltanatty ashylýy ótti, dep habarlaıdy Habar24. Sharany elordalyq dene shynyqtyrý jáne sport basqarmasy, Astana qalasy ákimdiginiń sporttyq-buqaralyq sharalardy ótkizý jónindegi dıreksııasy jáne elorda ákimdiginiń №2 Balalar men jasóspirimderdiń sporttyq mektebi uıymdastyrdy. Jarysta barlyq jas sanattary boıynsha erler men áıelder, qyzdar men jigitter qatysady. Saıys erejesine sáıkes, árbir jas kategorııasynyń ókilderine belgili bir qashyqtyq berilgen. Shańǵymen júgirýden erler arasyndaǵy ortasha qashyqtyq 2 km bolsa, áıelder 1 shaqyrymdy eńserýge tıis. 18 jastaǵy jasóspirimder arasynda ortasha qashyqtyq 5 km, qyzdarda 3 km, al 10-12 jas aralyǵyndaǵy kishkentaı sportshylar kılometrlik qashyqtyqty eńseredi. «Bul – dástúrli túrde ótetin shara, bıyl biz ony alǵash ret «Astana ormany» jasyl beldeýiniń aýmaǵynda ótkizýdi sheshtik. Jarystarǵa qatysý úshin 90 adam tirkelgen, bul 2009 jyly týǵan jáne odan úlken balalar, ardagerler de kelip jatyr. Jalpy, reglament boıynsha 7 jas toby bar. Jeńimpazdar úshin estelik syılyqtar men júldeler qarastyrylǵan», - deıdi №2 Balalar men jasóspirimderdiń sporttyq mektebi basshysynyń orynbasary Petr Belyı. Uıymdastyrýshylar «Astana ormany» jasyl beldeýiniń aýmaǵy bolashaqta qala turǵyndary men sport súıer qaýymnyń belsendi demalys ótkizetin súıikti ornyna aınalady.