Elbasy qazaqstandyqtardy jańa jylmen quttyqtady

Memleket basshysy Nursultan Nazarbaev qazaqstandyqtardy jańa 2017 jylmen quttyqtady. "Sanaýly sátterden soń biz Jańa 2017 jylǵa qadam basamyz. О́tip bara jatqan Meshin jyly elimiz úshin erekshe mereıli meje boldy. Bıyl búkil halyq bolyp, qasterli Táýelsizdigimizdiń 25 jyldyǵyn atap óttik. Jas memlekettiń shırek ǵasyrlyq shejiresi el tarıhynda altyn árippen jazyldy. Bul - bizdiń mańdaıymyzǵa buıyrǵan mereıli mártebe, enshimizge tıgen eren baqyt. Jańa jyldy qarsy alar sátte bereke-birligi jarasqan halqyma zor alǵys aıtamyn! Bıylǵy mereıtoılyq jyl biz úshin birqatar mańyzdy sharalarǵa toly boldy. Eldiń saıası ómirindegi eleýli naýqan - Parlament saılaýyn ótkizdik",- dedi Elbasy. "Uly maqsat kózdegen Ult josparynyń alǵashqy jylyn tabysty aıaqtadyq. Aldaǵy 2017 jyldyń enshisinde de aıtýly oqıǵalar men aýqymdy ister mol bolmaq. Elimiz Birikken Ulttar Uıymy Qaýipsizdik keńesiniń turaqty emes múshesi retinde qyzmetin bastaıtyn bolady. Bul - kez kelgen memleket qol jetkize bermeıtin asqaq abyroı, mártebeli mindet. Keler jyly Astana meımandary "EKSPO-2017" halyqaralyq kórmesinde bas qosatyn bolady. Sonymen qatar, Almatyda dúnıe júzilik Qysqy ýnıversıadanyń alaýy jaǵylady. Eńseli elordamyzda Islam yntymaqtastyq uıymynyń sammıti ótedi",- eske aldy Memleket basshysy. "El qýatty bolmaı, baq turaqty bolmaıdy. Halyqtyń ál-aýqatyn arttyryp, ekonomıkamyzdy damytýǵa arnalǵan sharalar jalǵasyn tabady. Biz endi Táýelsiz elimiz úshin jańa 25 jyldyqtyń jarqyn paraǵyn ashamyz. Tabaldyryqtan attaǵaly turǵan Jańa jyl tabysty da taǵylymdy jyl bolsyn! Barshańyzǵa zor densaýlyq, mol baqyt, elimizge búgingiden de bıik jetistikter tileımin! Jańa jyl qutty bolsyn!", - dep quttyqtady sózinde Memleket basshysy.