Foto: IIM
Ishki ister mınıstri Erjan Sádenov Shymkent qalalyq polısııa departamentiniń jańa basshysy retinde Muhtar Qojaevty tanystyrdy.
Muhtar Qojaev 2023 jylǵy jeltoqsannan beri IIM-niń Tergeý departamentin basqarǵan. General-maıor polısııa salasynda tergeýshiden bastap mınıstrliktiń ortalyq apparatyndaǵy departament basshysyna deıingi joldan ótken, basqarýshylyq jáne tergeý tájirıbesi mol maman.
Al burynǵy departament basshysy Prezıdent tapsyrmasymen júrgizilgen tekserý men Ishki ister mınıstrligindegi qyzmettik tekseris qorytyndysy boıynsha qyzmetinen bosatyldy. Sondaı-aq birqatar qyzmetkerge qatysty salǵyrttyq deregi boıynsha qylmystyq is qozǵaldy.
Qyzmettik tekseriske ne túrtki boldy?
Qyzmettik tekseris Shymkent qalasynyń turǵyny Nuraı Serikbaıdyń ólimine baılanysty bastalǵan. 11 qańtar kúni jas qyz pyshaq jaraqatynan kóz jumǵan. Derekterge sáıkes, qylmysqa deıin kúdikti oǵan qoqan-loqy kórsetip, izinen andyǵan. Marqumnyń ata-anasy polısııaǵa birneshe márte aryzdanǵanymen, sol kezde qylmystyq is qozǵalmaǵan.
Bul jaǵdaı qoǵamda rezonans týdyrdy. Prezıdent te jaǵdaıǵa nazar aýdaryp, quqyq qorǵaý organdarynyń áreketterine prınsıpti baǵa berý qajettigin aıtty jáne tergeýdiń ádil júrgizilýin qamtamasyz etýdi tapsyrdy.
Nuraı Serikbaıdyń isi «Asa qatygezdikpen kisi óltirý» babyna ózgertildi
Jańa basshy Muhtar Qojaevqa qaladaǵy quqyqtyq tártipti nyǵaıtý, azamattardyń qaýipsizdigin qamtamasyz etý jáne polısııa jumysyna degen senimdi qalpyna keltirý mindeti qoıyldy.
