«Astana» oıynshysy ıtalıan klýbynyń nazaryna ilikti

«Astananyń» jartylaı qorǵaýshysy Nemanıa Maksımovıchke endi Italııanyń «Iýventýsy» da kóz tikti. Bul týraly vesti.kz habarlady. Tuttojuve.com aqparaty boıynsha, bul komanda ortalyq jartylaı qorǵanysty kúsheıtýdi josparlap otyr. Olar qazirgi sátte qorǵanys pen shabýyldy baılanystyratyn oıynshyǵa zárý. Atalǵan saıt Maksımovıchti óziniń talanttylyǵymen, fızıkalyq turǵydan myǵymdylyǵymen jáne ámbebaptylyǵymen týrındikterdiń nazaryna ilikkenin habarlady. Serbııa ulttyq quramasynyń fýtbolshysy 3 mıllıon eýroǵa baǵalanyp otyr. Bir qyzyǵy osydan bir jarym jyl buryn ol sports.kz saıtyna bergen suhbatynda dál osy «bıankonerılerdiń» sapynda óner kórsetý armany ekenin aıtqan. Sondaı-aq, jaqynda «Iýventýstyń» burynǵy fýtbolshysy Zoran Mırkovıch ıtalıan ujymyna Maksımovıchke nazar aýdarýdy keńes etken. Budan bólek, oǵan «Roma», «Inter», «Mılan» komandalary serbııalyqqa qyzyǵýshylyq tanytyp otyr. Aıta keteıik, týrındik klýb osy qysta Reseıdiń «Zenıtinde» oınaǵan Aksel Vıtseldi óz qatarlaryna qospaq bolǵan. Alaıda, belgııalyq sportshy Qytaıdan kelip túsken qomaqty usynysty qabyl alyp, ıtalııalyqtardyń bul jospary júzege aspaı qalǵan bolatyn.