Ulttyq mýzeıde áskerı taqyrypta fotokórme ashyldy

Ulttyq ulannyń uzaq jyldar boıy fototilshisi mindetin minsiz atqarǵan Vıacheslav Gelblıngtiń Ulttyq mýzeıde jeke fotokórmesiniń ashylýy saltanaty ótti. El Táýelsizdiginiń 25 jyldyǵyna arnalǵan  bul shara áskerı taqyrypqa arnalǵan kórme retinde elimizde tuńǵysh ret uıymdastyryldy. Táýelsizdik jyldarynda Ulttyq ulannyń el tynyshtyǵyn qorǵaýdaǵy eren eńbegi men dańqty jaýyngerlik joly fotosýretter arqyly ártúrli basylymdarda oqtyn-oqtyn jarııalanyp jatty. О́ıtkeni, tasqa basylyp, shejire retinde qattalǵan baspa betterindegi fotosýretter men reportajdar ózge de shyǵarmashylyq týyndylar óz zamanynyń tynysynan habar beretin. Bul baǵytta sońǵy 15 jyl ishinde áskerı fotoshejireniń qalyptasýyna eleýli úles qosyp, óziniń kásibı sheberligimen qoltańbasyn qaldyrǵan kánigi fototilshi, zapastaǵy praporshık Vıacheslav Gelblıngtiń eren eńbegin eskermeý múmkin emesteı. «Apta boıy kórermen nazaryna usynylatyn fotokórmeni uıymdastyrýdaǵy negizgi maqsat – áskerı qyzmetkerlerdi rýhanı turǵyda tárbıeleı otyryp, azamattardyń ishki mádenıeti men sana-sezimin oıatý ári damytý bolyp tabylady. Sonymen qatar, Otan qorǵaýshylardyń boıyna patrıottyq rýhty sińirýde áskerı fotojýrnalıstıkanyń mańyzy zor ekendigin kópshilikke uǵyndyrý edi», – dedi saltanatty sharanyń ashylý rásiminde sóz alǵan Ulttyq ulan bas qolbasshysynyń tárbıe jáne áleýmettik-quqyq jónindegi orynbasary, general-maıor Muhametqalı Satov. Negizinen, quqyqtyq tártip áskeriniń bas fototilshisi Vıacheslav Gelblıngtiń obektıvinen tys qalǵan áskerı ómirdiń kórinisteri neken-saıaq. Ol túsirgen fotosýretterdiń kópshiligi kórermen kózaıymyna aınalyp, jurtshylyqtyń ystyq yqylasyna bólengen. Bul sózimizge onyń jeke muraǵatynda saqtalǵan bir mıllıonnan asa fotosýrettiń ashylmaǵan syrlary aıqyn dálel bola alady. Al olardyń barlyǵy derlik memlekettik jáne halyqaralyq deńgeıdegi sharalar kezinde el men Ishki áskerdiń, Ulttyq ulannyń birinshi tulǵalarynyń, sondaı-aq jaýyngerlik qyzmettiń tynys-tirshiliginen habar beredi. Táýelsizdik tańyndaǵy aıtýly oqıǵalardy pash etetin osyndaı fotosýretter ishinen iriktelip, kórmege qoıylǵan 54 týyndy árqıly taǵdyrdy arqaý etedi. Onyń túsirilý tarıhynan bólek, jurtshylyq nazaryna usynýdyń ózi asqan muqııattylyq pen jaýapkershilikti júkteıdi. «Sýretterimniń ishinde ózime erekshe unaıtyny «Bratıshkı» dep atalatyn týyndym. О́ıtkeni, ásker qatarynda qyzmet etip júrgen býyndar arasyndaǵy sabaqtastyqtyń saqtalýyna qatysty oı aıtylatyn bul týyndym Máskeýde ótken halyqaralyq fotoóner aptalyǵynyń «О́mir» jáne «Adamdar» nomınasııasynyń jeńimpazy (2013 j.) atanǵan. Qas-qaǵym sátte qaǵyp túsýi tıis kartınada beıneniń mazmundyq jaǵynan ashylýy men onyń berilý formasy da óte sátti shyqqan sekildi», – deıdi avtor. Aıta keteıik, Vıacheslav Gelblıng Qarýly Kúshterdiń 10 jyldyǵyna arnalǵan «Armııa – týǵan jer men eldiń qurysh qamal qorǵany» taqyrybymen ótken foto baıqaýdyń laýreaty. Al «Ulttyq ulan Táýelsizdik kúzetinde» degen ataýmen uıymdastyrylǵan kórme 12 qańtarǵa deıin jalǵasatyn bolady dep kútilýde. Nurlybek DOSYBAI, «Egemen Qazaqstan»