Alashtyń abyz aqsaqaly Báıken Áshimulynyń 64 jyl otasqan jar-qosaǵy, asyl jeńgemiz Baqyt Ásetqyzy alystaǵy Izraıl elinde baqılyq saparǵa attanǵanyn estigende, kóńilimiz qulazyp, júregimiz júdep sala bergen. О́zim syrqattanyp júrsem de, Astanada baıyz taýyp otyra almaı, akademık Kenjeǵalı Saǵadıev ekeýmiz orny tolmas aýyr qaza ústinde áz-aǵanyń qasynan tabylaıyq dep jeksenbiniń keshinde Almatyǵa shuǵyl jettik. Eldiń eldigi osyndaıda tanylady-aý, osy keshte nesheme teńizdiń ar jaǵynan arnaıy ushaqpen qımas jannyń máıiti de kelip jetti.
Osydan bir jarym aı buryn naýqasy meńdegen Baqyt Ásetqyzynyń kóńilin suraýǵa ádeıilep kelip ketkem. Dárigerler palatasyna kirip kórisýge ruqsat etpegen. Báıken aǵa qaptaldaǵy bólmede, kúndiz-túni qasynda eken. Jaqyn janǵa degen jumsaq júreginiń janashyr meıiriminiń ózin úlken ulaǵatqa balap edim sonda. On jastaǵy bala kezimnen biletin, 14 jyl boıy Qazaqstan úkimetin basqarǵan, asa kórnekti memleket qaıratkeri Báıken Áshimulynyń ulaǵatty shańyraǵynda qudaı qosqan qosaǵy Baqyt Ásetqyzynyń alatyn orny erekshe bolatyn. Biz bilgen kezderdiń bárinde súıkimdi de súıikti Baqyt jeńgemiz degende Báıken aǵamyzdyń da shyǵarda jany basqa edi. Asyl aǵa-jeńgeniń qosylǵandaryna 50 jyl tolǵan altyn toılaryn qazaqtyń ıgi jaqsylary qýana dúrildetip ótkizgeni de kúni keshegideı kóz aldymyzda. Baqyt Ásetqyzy árdaıym osynaý qasterli otbasynyń, ısi qazaqtyń qadirli úlken qara shańyraǵynyń qydyry, analardyń anasy, nemere-shóberelerdiń áz-ájesi, syılastyqtyń jibek jibi bolyp, aınalasyn jaıdary da jadyra kóńiliniń, móldiregen taza júreginiń kúnshýaǵymen aıalaýdan tynbaı ótti. Tirshilik túıtkilderiniń bárin oryndy ornyna keltirip, qabaq shytys pen kirbińge eshqashan eshbir sańylaý qaldyrmaı, jurttyń barlyǵyn baýyrlastyryp, azamattardy baýyrǵa tartyp, aǵanyń joldastaryn birge týǵannan artyq syılap, aǵaıyn men týystyń arasynda syılastyqtyń dárejesin arttyryp, dánekeri bolyp, bireýdiń qýanyshyn, endi bireýdiń renishin bólisip, tilekshi ázız ana bolyp júretin de osy bizdiń asyl, aıaýly jeńgemiz Baqyt Ásetqyzy edi. Sodan da bolar, Báıken aǵa ekeýiniń osy berekeli beıil, aq nıet, keń minezderine qudaıdyń bergeni de ras. Osy yrys-baq endi keıingi urpaǵyna juǵysty bolsyn deımiz. Baqyt Ásetqyzy erdiń serigi, eldiń anasy bola bildi. Ol kisini Alekseı Kosygın, Dinmuhammed Qonaev sııaqty el aǵalary, Oljas Súleımenovteı sańlaq aqynymyz, jalpy zııaly qaýym túgeldeı qurmet tutyp syılady. Bákeń zeınetkerlikke shyqqan ýaqyttardan beri de qos aqqýdaı jarasqan qadirmendi qosaq, jarasty jup egemen eldiń alaqanynda, qurmet tórinde boldy. Aıpara ana, Domalaq ene tektes ónege shashyp ótken osynaý asyl ananyń armany bolmas dep bilemin. Aldy jaryq, arty qaıyrly bolsyn. Aýyr qaza ústinde bolǵanǵa bolattaı bolaryńyzǵa senemin, qadirmendi Báıken aǵa. Maqtaı SAǴDIEV. Astana.
