Golovkın: Sharshy alańda ózińe degen senimdilik bolý kerek

WBA (Super), IBO, WBC jáne IBF tujyrymdary boıynsha álem chempıony qazaqstandyq Gennadıı Golovkınniń (36-0, 33 KO) Big Bear lagerinde ótkizgen jattyǵýlaryna qarap WBA (Regular) belbeýiniń ıegeri amerıkalyq Denıel Djeıkobsty (32-1, 29 KO) jeńetinin aldyn ala bilýge bolady, dep jazady LA Times basylymy. «Bizge kelip jattyǵatyn talanatty jastar kóp. Biraq olar meniń jasaǵanymdy qaıtalaı almaıdy. Jastar úshin bul tym kúrdeli. Munda kelgender meniń ózgeshe daıyndalatynymdy biledi. 34 jasqa kelsem de, joǵary deńgeıde jattyǵyp júrmin, árıne bul meni qýandyrady», – dedi Golovkın. GGG-diń kúshine shek keltirýge bolmas. 36 jekpe-jektiń 33-in merziminen buryn aıaqtap, 23 kezdesýin qatarynan nokaýtpen jeńgen, dep jazady LA Times. «Ýaqyt óte kele bálkim qarsylastarymnyń soqqylaryn sezinetin bolarmyn. Múmkin sol kezde júreksinetin shyǵarmyn. Biraq qazirgi ýaqytta ózimdi barynsha kúshti seziný úshin tynbaı jattyǵyp júrmin. Qarsylastarymnyń soqqysyna tótep berý úshin ıegim men moınymnyń bulshyq etterin jıi shynyqtyramyn. Sebebi, bir ǵana soqqy josparymnyń kúl-talqanyn shyǵarýy múmkin», – dedi qazaqstandyq boksshy. Gennadıı sońǵy sparrıng kezinde ekinshi orta salmaqtaǵy brıtan boksshysy Djordj Groývstiń qabyrǵasyn syndyrypty. Al sońǵy jekpe-jeginde qarsylasy Kell Brýktyń kózin shyǵara jazdaǵan bolatyn. «Bul jerde kóp nárse tek kúshke ǵana baılanysty emes. Sharshy alańda ózińdi ustaýyń, senimdiligiń bolý kerek», – dedi ol. Aıta keteıik, Golovkın 18 naýryzda Nıý-Iorktegi Madison Square Garden arenasynda amerıkalyq Denıel Djeıkobspen judyryqtasady. Elimizde bul kezdesýdi «Qazaqstan» jáne «KazSport» telearnalary 19 naýryzda 08:00-de tikeleı efırde kórsetedi.