«Nurly jer» baǵdarlamasy aıasynda júzege aspaq
Búgingi kúni oblys ortalyǵynyń «Nur Aqtóbe» dep atalatyn turǵyn úı aýmaǵy qyzý qımyl men qarbalasqa toly. Arshyndy tehnıkalar arqyrap-kúrkirep jer qazý jumystarymen aınalysýda. Ekinshi múıiste «Kamazdardan» ártúrli qurylys materıaldary túsirilýde. Bir sózben aıtqanda, bul mańaıdyń bári kóp keshikpeı qyzǵan toıdaı dúrildep ketkeli tur. Bul kórgenimiz «Nurly jer» baǵdarlamasy aıasynda júzege asatyn az qabatty úıler qurylysynyń qarylǵash-qadamdary bolyp shyqty.
Birinshi kókeıge kelgeni áleýmettik máni men mańyzy asa joǵary bul qurylys qandaı qarjy kózderi esebinen turǵyzylmaq degen saýal boldy. Osy oıymyzdy Aqtóbe oblystyq qurylys, sáýlet jáne qala qurylysy basqarmasynyń basshysy Serik Tólenbergenovke jetkizgen edik. Onyń aıtýynsha, mundaǵy alǵashqy qarjylandyrý tetigin aıqyndaıtyn oblys ortalyǵyndaǵy úı qurylysy kombınaty bolyp shyqty. Sondaı-aq, qurylys jumystary atalmysh kombınattyń tehnologııasy boıynsha tez ári qysqa merzimde turǵyzylmaq. Mamandardyń málimdeýinshe, atalǵan qalashyq qurylysy jobasynyń elimizde eshqandaı balamasy joq. Turǵynúı qurylysjınaq−banktiń nesıelik qarajattary esebinen turǵyzylatyn aıryqsha joba alǵash ret Premer-Mınıstrdiń birinshi orynbasary Asqar Mamınniń óńirge jumys sapary kezinde tanystyrylǵan.
−Bıyl turǵyzylatyn «Taýnhaýs» úlgisindegi úsh qabatty turǵyn úıler atalmysh bankte esepshoty ashylǵan ári tólem qabileti bar dep tabylǵan azamattarǵa kezek boıynsha beriledi. Budan olar eki jaqty paıda taba alady. Birinshiden, tegin jer telimine ıe bolady. Ekinshiden, turǵyndar qysqa merzim ishinde baǵasy joǵary emes, qoljetimdi baspananyń ıesi bolyp shyǵa keledi. Aldyn ala jasalǵan esepter boıynsha «Nurly jer» baǵdarlamasy aıasyndaǵy az qabatty turǵyn úılerdiń bir sharshy metriniń quny 120 myń teńgeden aspaıdy. Salystyrmaly túrde alǵanda muny ortadan tómen baǵa dep sanaýǵa ábden bolady. О́ıtkeni búginde kóp qabatty úılerdegi tórtinshi jáne besinshi qabattarynyń ózi bir sharshy metr turǵy úı alańyna shaqqanda naryq baǵasyna sáıkes 140-150 myńnan satylýda, deıdi S.Tólepbergenov.
Az qabatty turǵyn úı qurylystary ómir súrýge, júrip−turýǵa jáne kirip shyǵýǵa óte yńǵaıly ekeni tájirıbede dáleldengen. Alaıda mundaı erekshe qurylystardy turǵyzý tıimsiz dep sanaıtyn elimizdegi birqatar qurylys kompanııalary ony salýdan qashqalaqtaıtyny da jasyryn emes. Soǵan qaramastan bul joly óńirde az qabatty úıler turǵyzý tásili nege tańdalǵan? Muny eń aldymen «Nurly jer» baǵdarlamasynyń tıgizgen shapaǵaty dep qabyldasaq artyq bolmaıtyn shyǵar. Onyń ústine bul jobany turǵyn úı qurylysy kombınaty tehnologııasy boıynsha tez turǵyzý tásili tańdalǵany onyń ózindik quny men artyq shyǵyndardy birshama tómendetken. Sondaı-aq, oǵan budan ózge de baǵasy arzan sapasy joǵary jergilikti qurylys ındýstrııasynyń ónimderi paıdalanylýy da áleýmettik baspananyń qoljetimdiligin birshama jaqyndata túskeni anyq.
Qazirgi kúni zaman talabyna saı salynatyn «Taýnhaýs» tıpindegi úsh qabatty, sonymen qatar qos qabatty úıler turǵyzýǵa aımaqtaǵy tájirıbeleri mol, kásibı deńgeıleri joǵary jergilikti qurylys fırmalary kirisip ketti. Birinshi kezeńde qurylys atalǵan fırmalardyń óz qarajattary esebinen boı kótermek. Sodan soń konkýrstyq úderister jolymen ázir turǵan úılerdi satyp alý tártipteri júrgizilmek. Tutastaı alǵanda, az qabatty turǵyn úıler «Nur Aqtóbeniń» birneshe shaǵyn aýdanynda paıdalanýǵa berilmek. Qurylystyń jalpy aýmaǵy 100 gektardan asady. Onyń ınjenerlik-kommýnıkasııalyq jelilerin jobalaýǵa bıyl oblys bıýdjeti esebinen 150 mıllıon teńge bólingen.
Mine, osylaısha qazirgi kúni Aqtóbe aımaǵynda jergilikti ári sapaly materıaldardy paıdalaný arqyly qysqa merzim ishinde áleýmettik turǵyn úıler salý jobasy qolǵa alyndy. Astyn syzyp aıtqanda, bul taǵy da elimizde balamasy joq qalashyq turǵyzýdyń taptyrmas úlgisi bolyp shyǵady. Qysqasy, Aqtóbedegi az qabatty úıler turǵyzý isi turǵyndardyń baspana máselesin sheshýine septigin tıgizbek. Ekinshiden, osy arqyly jergilikti óndirisshilerdiń júktemesi de tolyǵymen ótelmek.
Temir QUSAIYN, «Egemen Qazaqstan»Aqtóbe oblysy
