Qyrshyn ómirdiń óteýi kimnen?

Búgingideı qoı ústine boztorǵaı jumyrt­qalaǵan zamanda kináliler jazadan qutylyp ketedi dep esh oılamappyn. «Egemen Qazaqstan» gazetinde jaryq kórgen «Qorǵaýshy ma, qor­laýshy ma?» degen maqalany (28 aqpan) oqyp, jaǵamdy ustadym. «Sumdyq-aı» degen­nen basqa sóz aýzyma túser emes. Jarty ǵasyrǵa jýyq ýaqyt prokýratýra sala­synda qyzmet istedim. Ol ýaqyttarda da túr­li qylmystar oryn alyp jatatyn. Biraq zań talaptary múltiksiz saqtalatyn. Ádildiktiń ús­tem­dik qurýyna múddeli organdardyń, onyń ishin­de advokatýra da bar, on ekide bir gúli ashyl­maǵan qyz balanyń “ashy ólimine” beıjaı qara­ǵa­ny janymdy qatty aýyrtty. О́rimdeı qyzdyń ashy ólimin jyly jaýyp qoıý áreketteri túsiniksiz. Aýdan prokýrory qylmystyq quramnyń bolmaýyna baılanysty is toqtatylǵanyn alǵa tartady. Zorlaý faktisi boıynsha ǵana qylmysker jazasyn alǵan. Al jasóspirimdi sýısıdke májbúrlegender sútten aq, sýdan taza keıip tanytyp, taırańdap júr. Mundaılar jazasyz qalmaýy tıis. Adam ómirin oıynshyqqa aınaldyrý – baryp turǵan bassyzdyq. Sonyń kesirinen órimdeı balanyń ómiri qıyldy. Bul oqıǵa shańyraǵynda álpeshtep ul-qyz ósirip otyrǵan ata-analarǵa da, ustazdarǵa da sabaq bolýy kerek. «Kózimniń qarashyǵy» dep ósirgen balasyn áldebireýler mazaqqa aınaldyrsa, áke-shesheniń jaryq kúni túnge aınalǵany emes pe? Obal-aı, qyrshynnan qıylǵan ǵumyrdyń óteýin kimnen suraımyz? Eń soraqysy, advokat beıkúná sábıdi aınalasyndaǵylarǵa jekkórinishti qylyp kórsetý úshin ósek-aıańǵa jol berip, jala japqan, qolynan kelgenshe qaralaǵan. Shyndyqty ótirikpen búrkemelegen mundaı qorǵaýshydan ne úmit, ne qaıyr? Qyzǵaldaq gúldeı ǵana ǵumyr keship, aryn ajalmen arashalaǵan beıkúná qyzdyń múshkil halin mańaıyndaǵylardyń túsinbegeni, qolushyn bermegenderi óte ókinishti. Abyz jasqa kelgen shaǵymda qolyma qalam alyp, bir otbasyna baqytsyzdyq ákelgen oqıǵaǵa bekerden-beker ún qosyp otyrǵan joqpyn. Jas qyzdyń ólimine kináli jandar óz jazasyn alsa eken degen ótinishimdi quzyrly organdar eskerip, zerdeleıtin shyǵar degen senimdemin. Sapar DÚISENOV, soǵys jáne eńbek ardageri, prokýratýranyń qurmetti qyzmetkeri PETROPAVL