Serik ELEÝOV: Bizdiń boksta bolashaǵy zor jastar jetkilikti

Pavlodarda ótip jatqan bokstan Qazaqstannyń erler arasyndaǵy chempıonatyn respýblıka sportynyń tarıhynda esimderi qalǵan tulǵalar da tamashalaýda. Olardyń qatarynda bokstan Afına Olımpıadasynyń qola júldegeri, qaraǵandylyq Serik Eleýov te bar. Biz birinshilik barysynda belgili bylǵary qolǵap sheberimen az-kem áńgimelesken edik. – Serik, chempıonat kóńilińizden shyǵyp jatyr ma? – Irikteý kezeńderi artta qalyp, jartylaı fınalǵa joldama alǵandar anyqtaldy. Demek, naǵyz shaıqas endi bastalmaq. Shırek fınalda da tartysty jekpe-jekter boldy. «Júldeler aýylyna» aıaq basqandardyń qatarynda esimderi elge tanyla qoımaǵan jas sportshylar da bar. Pavlodar rıngi jańa esimder jazylatyn doda bolaryna senemin. Sondaı-aq, bul chempıonat óte joǵary deńgeıde uıymdastyrylǵan dodalardyń biri retinde el esinde qalýy kerek. – Rıo Olımpıadasyna qatysqan boks­shylardyń chempıonattaǵy ónerin qalaı baǵalaısyz? – Olımpıadashylar – birinshiliktiń bas­ty favorıtteri. Sondyqtan, olar ózderine artylǵan senimdi aqtaıdy degen oıdamyn. Buǵan dálel: Jánibek Álimhanuly men Qaırat Erálıev te, Abylaıhan Júsipov pen Ilııas Súleımenov te – jartylaı fınalda. Qyzyqtyń bári alda. – Birinshilikte siz kútpegen nátı­jeler boldy ma? – Ázirshe sensasııa kórgen joqpyn. Dese de, 75 kıloǵa deıingi salmaqta synǵa túsip jatqan qyzylordalyq Tursynbaı Qulahmetovti bóle-jara atap ótkim keledi. Menińshe, bolashaǵynan zor úmit kúttiretin jastyń biri osy Tursynbaı bolýǵa tıis. Sondaı-aq, 64 kılodaǵy jigitterdiń de óneri unady. – Pavlodar boksy degende oıyńyzǵa aldymen ne keledi? – Sońǵy jyldary elimizde boksty damytýǵa aıryqsha kóńil bólgen óńirlerdiń qatarynda Pavlodar da bar. Sportshy retinde bul jaqqa tabanym tımepti. Alǵash ret bıyl kóktemde, jastar arasyndaǵy Azııa birinshiligine keldim. Mine, ekinshi ret Pavlodar jerindemin. Munda boksshylarǵa óte jaqsy jaǵdaılar jasalǵan. Qoldaý keremet. Tek jattyǵýǵa mán berip, nátıjeńdi jaqsartýdy ǵana bil. Jergilikti boks federasııasynyń prezıdenti Shýhrat Danbaı – bylǵary qolǵap sheberleriniń naǵyz janashyry. О́ńir boksynyń jańa satyǵa kóterilýi de osy kisiniń eńbegi dep bilemin. О́ńirlik federasııanyń atqarýshy dırektory Azamat Maqajanov ta jaqsy bastamalarǵa uıytqy bolyp júr. Oblystaǵy boksqa degen qamqorlyqty barǵan jerlerimde aıta júremin. Áńgimelesken Farhat ÁMIRENOV   PAVLODAR