«Túngi stýdııada" Elbasy ata-ana aldyndaǵy paryz jaıynda aıtty

«Qazaqstan» ulttyq telearnasynyń «Túngi stýdııada Nurlan Qoıanbaevpen» habarynda qonaqta bolǵan Prezıdent Nursultan Nazarbaev ata-anany qurmetteý, teledıdardyń qoǵam aldyndaǵy mańyzy jáne «Baqyt degen ne?» atty suraq tóńiregindegi oılaryn aıtty. «Jumys babymen kóp jerlerde bolam ǵoı. Keıde qarttar úıine de baram. Sonda qazaq qarttaryn kórem. Meniń jastaý kezimde mundaı orynda qazaqtyń qarııalary bolmaýshy edi. Qazir qazaq qarttaryn da kóretin boldyq. Jandaryna otyryp «Balalaryńyz bar ma?» dep suraımyn. Sonda olardyń kóbi «Ony suramaı-aq qoıyńyz» dep jaýap beredi» degen Elbasy ata-anany qurmetteýdiń qandaılyq uly paryz ekenin aıtty. «Olarǵa bir nárse bólip berý de qajet emes. Tek jandaryna biraz otyryp, qushaqtasańdar, sonyń ózi olar úshin úlken qýanysh» dedi Prezıdent. Sonymen qatar Nursultan Nazarbaev teledıdardyń aǵartýshylyq, adamgershilikke shaqyrý baǵyty basym bolýy kerektigin atap ótti. «Menińshe, teledıdardyń maqsaty – jaqsy nársege úıretý» dedi Elbasy. Nursultan Nazarbaev qatysqan «Túngi stýdııa» habary shamamen on mınýtqa sozyldy.