Kókshetaýda – merekelik kóńil-kúı

Qazaqstan Respýblıkasy Táýelsizdiginiń 25 jyldyǵy men Tuńǵysh Prezıdent kúnin merekeleý aıasynda keshe Kókshetaý qalasynyń jurtshylyǵy segiz birdeı nysannyń ashylý saltanatyna kýá boldy. Bulardyń barlyǵy eko­no­mı­kalyq, áleýmettik jaǵynan qara­ǵanda da asa mańyzdy edi. Ási­rese, qalaǵa qarasty Krasnyı Iаr kentindegi 9 gıgakalorııalyq blok­tyq-modýldik bý qazandyǵy paı­dalanýǵa berilip, 23 kópqabatty turǵyn úı men 7 áleýmettik-má­denı nysandy arzan jylýmen qamtamasyz ete bastady. Sóı­tip, kópshilikti qýanyshqa bóleý­de. Saltanatty rásimdegi quttyq­taýynda oblys ákimi Sergeı Kýla­gın ınjenerlik jelilerdiń iske qosylýymen ortalyqtan jylytylatyn úılerdiń sany arta túsetinin atap kórsetti. Bý qazandyǵynyń qu­ry­lysyna «Nurly jol» mem­le­kettik baǵdarlamasy aıasynda 870 mıllıon teńge qarjy bólingen. Oblys bıyl turǵyn úı qu­ry­lysy jóninen respýblıkalyq deń­geıde aldyńǵy sapqa kóterildi. Bul Elbasy N.Á.Nazarbaevtyń Táýelsizdiktiń alǵashqy kúninen bas­tap memlekettiligimizdi qazaq­standyqtardyń jaıly turmysyn qamtamasyz etetin úlken úı turǵyzý týraly aq tileginiń oryndalyp otyrǵanyn aıǵaqtaıdy. Sonyń bir dáleli retinde «Sa­ry­arqa» shaǵyn aýdanyndaǵy 9 qabatty, 45 páterli turǵyn úı ıeleriniń qonys toıyn aıtýǵa bolady. Ǵımaratty «Konkýrs» JShS qurylysshylary qysqa merzimde ári sapaly salyp shyqqan. Jalpy, «Saryarqa» boı kó­ter­gen úsh jylda 58 309 sharshy metr­lik kópqabatty 20 turǵyn úı paı­dalanýǵa berilgenin Táýelsizdik tartýy dep qabyldaýymyz kerek. Munda 755 otbasy jańa páter­ler­diń kiltin aldy. Sondaı-aq, shaǵyn aýdanda «Araı» balalar baqshasy, órt sóndirý deposy jumys istep tursa, 900 oryndyq mekteptiń qurylysy qarqyndy júrgizilýde. Bıylǵy merekeli jyly Qazaqstan-Belarýs «Vıraj-Hol­dıng» JShS quramyna enetin Kókshetaýdaǵy «Qazaqstan Agro Innovasııalyq Korporasııasy» seriktestigi kásipornynyń jumysqa qosylýy qala ómi­rin­degi aıtýly oqıǵa sanalady. Kókshelikter «KAIK» degen qys­qa at qoıǵan kásiporyn «Aýyl sharýashylyǵy jáne kommý­naldyq tehnıkalarynyń Qazaq­stan-Belarýs ındýstrııalyq-teh­­nologııalyq parki» ınvestı­sııalyq jobasyn tabysty jalǵas­ty­rýda. Bul nysan Aqmola obly­synyń kásipkerlikti qoldaý kar­tasyna engizilgen. Demek, seriktestiktiń bolashaǵy zor dep aıta alamyz. Jańadan ashylǵan alkogol­di ónimder shyǵaratyn «Grand­RoyalBottlers» jaýapkershiligi shekteýli seriktestigi 70 adamǵa jumys ornyn berip otyr. Zaýyt qurylysyna 1 mıllıard 300 mıl­lıon teńge ınvestısııa quıy­lyp, bir jyldyń ishinde qatarǵa qosyl­ǵanyn bildik. Munda Italııa­nyń ozyq jabdyqtary ornatylypty. Aty respýblıkamyzdan tys­qary jerlerge de keńinen málim «Kókshetaý mıneraldy sýlary» AQ mıneraldy sýlardy shyǵa­rýdyń klasterlik júıesi ınves­tısııalyq jobasynyń tanys­tyrylymyn ótkizdi. Jobanyń quny 3,7 mıllıard teńgeni quraı­dy. Jańa sehta 40 adam jumyspen qamtylyp otyr. Respýblıkamyzǵa «Nátıje» brendimen tanymal kásiporynnyń Kókshetaýdaǵy jańa zaýyty óńir turǵyndarymen qatar, Astananyń azyq-túlik beldeýin qamtamasyz etýge qyzmet etetin bolady. Munda sút ónimderiniń 20-dan astam túri qaıta óńdeledi. О́ńirdiń reıtıngtik deńgeıin nyǵaıtýǵa ekpin qosatyn jobany júzege asyrýǵa 500 mıllıon teńge qarjy jumsalsa, munyń 110 mıllıon teńgesi «Damý» qory arqyly bólinipti. Aıtýly merekeler qar­sań­ynda Zastasıonnyı kentiniń búl­dirshinderi aıryqsha qýanyshqa bólendi. Munda barlyq qolaı­lylyqtar qarastyrylǵan 240 oryndyq «Mıras» balalar baq­shasy esigin ashty. Oblystyq bıýdjet qarjysyna salynǵan bóbekter ordasynda qazaq tilinde tárbıe alatyn – 7, orys tilinde 4 jáne sanatorıılik top jumysqa kirisken. Bóbekter qutty bolsyn aıta kelgen qonaqtarǵa shaǵyn konsert qoıdy. Keshkisin qalanyń kórkin asha túsken jańa «GREENWhichHotel» qonaq úı kesheniniń samaladaı shamy jarqyraı jandy. Baqbergen AMALBEK, «Egemen Qazaqstan» Aqmola oblysy