Qaýipsizdik – barshaǵa ortaq másele

Qazaqstan Prezıdenti Nursultan Nazarbaev usynǵan ıadrolyq qarýsyz álem jobasy halyqaralyq qoǵamdastyq tarapynan jan-jaqty qoldaýǵa ıe bolǵany málim. Táýelsizdik toıy qarsańynda belgilengen juldyzdy 25 kúnniń biri «Iаdrolyq qarýsyz álem» atty taqyryptyq kúnge arnalýy bul máseleniń jahandyq aýqymdaǵy orny men mańyzyn odan ári kótere túsedi. Osyǵan oraı, keshe Oral qalasyndaǵy Dostyq úıinde taqyryptyq kezdesý ótki­zilip, oǵan etnomádenı birlestikterdiń jetekshileri, óńirdegi joǵary oqý oryn­darynyń professor-oqytýshylary men zııa­ly qaýym ókilderi qatysty. Bul is-shara kezinde ortaǵa oı-pikir tas­taǵandar Qazaqstan basshysy tarapynan usynylǵan ıadrolyq qarýsyz álem jo­basy olardyń bárin tańǵaldyrǵanyn atap kórsetti. Ári olar mundaı tereń izgilikke toly qadamdy ózge álemdik deńgeıdegi saıasatkerlerdiń qaıtalaı qoıýy da ekitalaı ekenine ekpin túsirdi. Sonymen birge, Qazaqstan ıadrolyq qarýdan óz erkimen bas tartýy arqyly álemdegi eń beıbitshiliksúıgish turaqty memleket qurýdyń jarqyn úlgisine aınalǵany týraly tujyrymdar jasady. Túıip aıtqanda, Qazaqstannyń álem el­deriniń qaýipsizdik kepilin ıelengen bire­geı el qatarynan oryn alyp úlgergeni or­taq áńgimeniń arqaýy boldy. Dóńgelek ústelde Oral qalasyndaǵy ev­reı etnomádenı birlestigi tóraǵasynyń orynbasary Felıks Baıýkanskıı beı­bit­shilik pen qaýipsizdikti saqtaý máselesi Mem­leket basshysynyń ǵana emes, so­nymen birge barsha qazaqstandyqtardyń, ár ujym men otbasynyń da tól paryzy ekenine toqtaldy. Mundaı qadamnyń bá­ri saıyp kelgende, Qazaqstan halqynyń aýyz­bir­shiligi men yntymaǵy arqyly ǵana berik or­nyǵa alady,  dedi ol dóńgelek ústelde sóı­legen sóziniń qorytyndysynda. Sondaı-aq, keshe oblys ortalyǵyn­daǵy Dostyq úıinde óńirlik qoǵamdyq kelisim mekemesi «Álem. XXI ǵasyr» ma­nıfesi taqyrybynda kitap kórmesin uıymdastyrdy. Temir QUSAIYN, «Egemen Qazaqstan» ORAL