Tuńǵysh Prezıdent kúni qarsańynda ashyldy
Maǵjan aqyn «Túrkistan – Er Túriktiń besigi ǵoı» dep jyrǵa qosqan kıeli shaharda «Áziret Sultan» memlekettik tarıhı-mádenı qoryq-murajaıy Qazaqstan Respýblıkasynyń Tuńǵysh Prezıdenti kúni qarsańynda «Túrkistan jáne Elbasy» kórmesiniń ashylý rásimin ótkizdi.
Qoryq-murajaı ıeligindegi Qoja Ahmet Iаsaýı kesheninde kıiz týyrlyqty qazaqty óz aldyna el qylýǵa eńbek sińirgen, tarıhta ornyn belgilegen Qasym han, Esim han, Táýke han jáne Abylaı han syndy ardaqtylarymyz máńgi tynyshtyq taýyp jatyr. Taǵdyr tezi qazaqty bodandyqtan qutqarmady. Abylaı han atoılap atqa mingen kezeńnen soń eki júz jyldan astam bodandyq qamytyn kıgen qazaqtyń óz aldyna azat el bolyp, Táýelsizdigin alǵanyna shırek ǵasyr ǵana boldy. «Túrkistan jáne Elbasy» kórmesinde elimizdiń qıly tarıhy ótkenmen astasyp osylaı óriledi.
Biz «Áziret Sultan» memlekettik tarıhı-mádenı qoryq murajaıynyń dırektory Jandos Ábýbákirden atalǵan kórmeniń máni men taǵylymy týraly qysqasha aıtyp berýin ótingen edik.
«Elimiz Táýelsizdigine endi qol jetkizip, egemen memleket retinde eńsesin tiktep jatqan jaýapty kezeńde Elbasy Túrkistan qalasynyń abyroıyn asqaqtatar, kúlli túrki jurtynyń basyn qosýǵa baǵyttalǵan jobalardy bekitti. Tuńǵysh ret kıeli mekennen Qoja Ahmet Iаsaýı atyndaǵy halyqaralyq qazaq-túrik ýnıversıteti ashyldy. Sonymen qatar, keseneniń kórik-kelbetin qalpyna keltirýge kúsh jumyldyryp, 2000 jyly Túrkistan qalasynyń 1500 jyldyq mereıtoıyn IýNESKO deńgeıinde atap ótýge barlyq jaǵdaıdy jasady.
Elbasymyzdyń qasıetti shaharǵa ár sapary jaqsy jańalyǵymen janǵa jebeý, oıǵa demeý bolyp keledi». «Áziret Sultan» memlekettik tarıhı-mádenı qoryq murajaıynyń dırektory Jandos Ábýbákir osylaı dedi.
Kórme ekspozısııasyna qoryq-murajaı qorynan 50-den astam jádiger qoıylypty. Onyń ishinde 1985 jyly Qazaq KSR Mınıstrler Kabınetiniń Tóraǵasy egemen, Táýelsiz Qazaqstannyń Tuńǵysh Prezıdenti tusyndaǵy, baýyrlas Túrik Respýblıkasynyń prezıdentteri Turǵyt О́zal, Súleımen Demırel, Ahmet Sezar, Abdýlla Gúl, Rejep Erdoǵan, О́zbekstan Respýblıkasynyń prezıdenti I.Karımovpen Túrkistandaǵy resmı keńesteri men Elbasy N.Á.Nazarbaevtyń qazaq, orys, aǵylshyn, túrik tilderinde jaryq kórgen «Ǵasyrlar toǵysynda», «Tarıh tolqynynda», «Syndarly on jyl», «Qazaqstan joly», «Kazahstanskıı pýt», «Beıbitshilik kindigi», «Týǵan elim – tiregim», «Evrazııskıı Soıýz: ıdeı, praktıka perspektıvy», «Kutup Yildizi», «Nursultan Nazarbayev» atty jaryq kórgen kitaptary jurtshylyqqa usynylǵan.
«Áziret Sultan» memlekettik tarıhı-mádenı qoryq-murajaıynyń turaqty ekspozısııasynda Elbasy N.Á.Nazarbaevtyń qoryq-murajaıǵa tabys etken Quran Kárim kitaptary, qazaqy oıýmen naqyshtalǵan zerli shapany tur.
Kórmeni tamashalaýǵa jurtshylyq kóptep kelýde. Olardyń qatarynda Iаsaýı kesenesindegi uly árýaqtarǵa zııarat etip kelgender de bar.
Baqtııar TAIJAN,
«Egemen Qazaqstan»
Ońtústik Qazaqstan oblysy
