1414-ke júginińiz, jón silteıdi

1414 Biryńǵaı baılanys ortalyǵyna habarlasatyn azamattardyń basym kópshiligi tólqujat, jeke jáne júrgizýshi kýáligin, mekenjaı týraly anyqtamany alý, sonymen qatar balanyń dúnıege kelýi men kútimine baılanysty járdemaqyny resimdeý suraqtary boıynsha habarlasady. Ortalyq mamandary kúnine 10-15 myń ótinim óńdeıdi. О́tken jyly soǵylǵan qońyraýlardyń jalpy sany 3,6 mıllıondy qurasa, bul kórsetkish bıylǵy on aıda 3,7 mıllıonǵa jetken. Memlekettik qyzmetter boıynsha táýligine jıyrma tórt saǵat tegin qyzmet kórsetetin 1414 Biryńǵaı baılanys ortalyǵyna keshe bes jyl toldy. «Ulttyq aqparattyq tehnologııalar» AQ elektrondy úkimet baılanys ortalyǵynyń negizinde irge qalaǵan mekemede bastapqy jyly nebári 30 qyzmet túri kórsetilse, búgingi tańda ortalyq operatorlary halyqqa 736 qyzmet túri boıynsha jón silteıdi. Jyl sońyna deıin atalǵan san taǵy da ulǵaıýy múmkin. Bul málimetterdi ataýly kúnge oraı ótken basqosýda Biryńǵaı baılanys ortalyǵynyń dırektory Anar Ulmanova aıtty. «Bizdiń mekeme bastapqyda qarapaıym ǵana baılanys ortalyǵy bolatyn. Al qazirgi ýaqytta azamattarmen qarym-qatynas ornatýdyń qosymsha arnalary bar. Endi memlekettik qyzmetterge qatysty suraqtar boıynsha 1414.kz saıty, elektrondy poshta jáne vırtýaldy onlaın-kómekshiler arqyly da habarlasyp, jaýap alýǵa ábden bolady», deıdi Anar Ulmanova. Ortalyq basshysynyń aıtýynsha, 1414 baılanys qyzmeti halyq­aralyq standarttarǵa sáıkes «EN 15838» sertıfıkatyn ıelen­gen jáne «WSIS PROJECT PRIZES-2016» halyqaralyq konkýr­sy­nyń jeńimpazy. Atalǵan jetistikter keńes berý qyzmetiniń joǵary sapada kórsetiletinin,  tutynýshylarǵa qyzmet kórsetý prosesiniń júıege qoıylǵandyǵyn dáleldeıdi. Búginde ortalyq tutyný­shylaryna 127 operator qyzmet kórsetedi. Olardyń qatarynda múmkindigi shekteýli jandar da bar, qyzmetkerlerdiń jumys isteýine barlyq jaǵdaı jasalǵan. «Jumysqa qabyldaý aldynda operatorlar áńgimelesýden ótedi, bul kezde dıksııalary, kúızelis jaǵdaılarynda sabyr saqtaýy, memlekettik til bilimi tekseriledi. Sodan keıin úmitkerler bir aptadan úsh aptaǵa deıin oqý kýrstaryna qatysyp, nátıjesin anyqtaý úshin test tapsyrady. Operatorlar tájirıbesi men biliktiligine qaraı úsh topqa bólinedi», deıdi ortalyq dırektory. «Qazirgi tańda azamattardyń kóbi memlekettik qyzmetterdi onlaın túrde alady, sondyqtan biz elektrondy sıfrly qoltańbany qalaı, qaı jerde alýǵa bolatyny týraly kóp suraq qabyldaımyz. О́tken jyly ESQ týraly 320 myńnan astam saýalǵa jaýap berdik», deıdi ádisteme bóliminiń bastyǵy Aqmaral Erǵalıeva. Aıta ketken jón, elimizdiń kez kelgen óńirinen jáne kez kelgen telefonnan táýlik boıy jumys isteıtin 1414 nómirine habarlasý arqyly memlekettik qyzmetter jóninde tegin keńes alýǵa bolady. Mundaı baılanys ortalyǵynyń balamasy álemniń birneshe damyǵan memleketinde ǵana bar. Ashat RAIQUL, «Egemen Qazaqstan»