Elimiz jetistikterine – joǵary baǵa

Qazaqstan Respýblıkasy Parlamenti Senaty Tóraǵasynyń orynbasary Bektas Beknazarov Túrik Respýblıkasy Uly Ulttyq Jınalysy Tóraǵasynyń orynbasary Mehmet Akıf Hamzachebımen kezdesti, dep habarlady Senattyń baspasóz qyzmeti. Áńgime barysynda B. Beknazarov baýyrlas halyqtar baılanysynyń tarıhı tamyry tereń ekenin atap ótti. Senat Tóraǵasynyń orynbasary Túrkııa bizdiń elimizdiń táýelsizdigin resmı tanyǵan alǵashqy memleket retinde tarıhqa engenin eske saldy. Túrik delegasııasynyń basshysy óz kezeginde qazaqstandyq depýtattardy jáne barsha halqymyzdy Qazaqstan Táýelsizdiginiń 25 jyldyǵymen quttyqtady jáne bizdiń elimizdiń jetistikterine joǵary baǵa berdi. Kezdesýge qatysýshylar ózara túsinistik pen ekijaqty saıası jáne saýda-ekonomıkalyq baılanystardy damytýdaǵy eki memlekettiń basshylary N.Á. Nazarbaev pen R.T.Erdoǵannyń úlesterin atap ótti. M.A.Hamzachebı 2016 jylǵy shildedegi tóńkeris jasaýǵa talpynýdan keıin Túrkııaǵa kelgen sheteldik alǵashqy Memleket basshysy N.Á.Nazarbaev bolǵanyna erekshe nazar aýdardy. Senat Tóraǵasynyń orynbasary B.Beknazarov Astananyń halyqaralyq bastamalaryna qoldaý bildirgeni úshin túrik tarapyna alǵys aıtty, sondaı-aq, meımandy Qazaqstannyń BUU Qaýipsizdik Keńesiniń turaqty emes múshesi laýazymyndaǵy negizgi josparlary týraly habardar etti. Múddeli dıalog barysyn­da mem­le­ketaralyq jáne parlamentaralyq ózara is-qımyldyń birqatar máseleleri talqylandy.