Shyǵys Qazaqstan oblystyq drama teatrynyń 20 akteri baspanaly boldy. Esterińizde bolsa, byltyr oblys ortalyǵynda jańadan salynǵan teatr ǵımaratynyń tusaýyn Elbasy Nursultan Nazarbaev kesip, shyǵarmashylyq ujymǵa sáttilik tilegen bolatyn. Endi akterler qaýymynyń qýanyshyn О́skemen qalasynyń Ablaketka yqshamaýdanynan berilgen jańa baspana eseleı tústi. 20 páter kiltiniń tabystalýy – oblystyq drama teatrynyń qazaq, orys jáne jastar trýppalarynyń ártisteri úshin Táýelsizdiktiń 25 jyldyq merekesi qarsańyndaǵy eń úlken tartý boldy.
Teatr dırektory Dinmuhamed Uıabaı oblys ákimi Danıal Ahmetovtiń sońǵy eki jylǵa jýyq ýaqytta jańa zamanaýı ǵımaratta jumys isteýge múmkindik alǵan shyǵarmashylyq ujymnyń áleýetin kóterýge úlken qoldaý kórsetip otyrǵanyn, sonyń bastysy osy o basta ýáde etilgen 20 páter bolyp otyrǵanyn jetkizdi. О́ıtkeni, teatrdyń shyǵarmashylyq áleýetin kóterý úshin talantty akterler quramyn jasaqtaý qajet. Osy údeden shyǵý maqsatynda Astanadaǵy "Shabyt" Qazaq ulttyq óner ýnıversıteti men Almatydaǵy T.Júrgenov atyndaǵy Qazaq ulttyq óner akademııasyn támamdaǵan jas akterler О́skemen qalasyna shaqyrtý alǵan edi. Olardyń arasynda alǵashqy shyǵarmashylyq eńbek jolyn Shyǵys óńirinde bastaǵandar da, osyǵan deıin Almaty, Semeı, Pavlodar qalalaryndaǵy teatrlarda tájirıbe jınap úlgergen jas akterler de bar. Olar Shyǵys Qazaqstanda shyǵarmashylyq qaýymǵa qajetti qoldaý bar ekenin aıtady.
– "О́z úıim – óleń tósegim" degendeı, ózimizge tıesili shańyraqqa qol jetkizgenimiz úshin qýanyshtymyz. Ásirese, balalardyń óz úıińde alańsyz oınaǵanyn kórý de baqyt eken, deıdi eki bólmeli páterge qol jetkizgen jas akterlerdiń biri Eldos Másálim. Al akterdiń jary Rysgúl jańa páterdiń keń, jaryq ári jyly bolǵanyna qýanyp júr.
Teatr basshysy Dinmuhamed Uıabaıdyń aıtýynsha, oblystyq teatrǵa jańa spektakl qoıý úshin dekorasııa men kıim daıarlaýǵa jáne mýzykamen árleýge 25 mıllıon teńge bólingen eken. Qazir shyǵarmashylyq quram Táýelsizdiktiń 25 jyldyq merekesine arnalǵan jańa qoıylymǵa qyzý ázirlik ústinde.
Dýman ANASh,
"Egemen Qazaqstan"
О́SKEMEN.
