Tasmaǵambetov balalar úıi tárbıelenýshilerine qatysty tapsyrma berdi

QR Premer-Mınıstriniń orynbasary Imanǵalı Tasmaǵambetovtiń tóraǵalyǵymen balalar úıleri tárbıelenýshileriniń sanyn azaıtý jóninde májilis ótti. Keńeske Parlament Májilisiniń depýtattary, Bilim jáne ǵylym mınıstri Erlan Saǵadıev, QR bala quqyqtary jónindegi ýákil Zaǵıpa Balıeva, sondaı-aq, ortalyq atqarýshy organdardyń, úkimettik emes jáne kommersııalyq uıymdardyń ókilderi qatysty. «Elbasy memlekettik organdarǵa balalar úılerinde tárbıelenip jatqandardyń sanyn azaıtý týraly tapsyrma bergeni belgili. Osy baǵytta memlekettik organdar tarapynan josparly jáne dáıekti jumys júrgizilip jatyr. Balalardy otbasyna ornalastyrýdyń balamaly formalary kóbeıip, asyrap alý, qamqorlyqqa alý, patronattan ózge, 2017 jyldan bastap qabyldaý jáne qonaqjaı otbasylary formasy enedi. Bulardyń barlyǵy memleket tarapynan materıaldyq qoldaýǵa ıe bolady», – dedi  Imanǵalı Tasmaǵambetov. О́z kezeginde Bilim jáne ǵylym mınıstri Erlan Saǵadıev bala asyrap alýdyń ashyqtyǵy men qol jetimdiligin qamtamasyz etý úshin bıyl sáýir aıynan beri jetim balalar men ata-anasynyń qaraýynsyz qalǵan balalardyń, sondaı-aq óz otbasyna bala asyrap alýǵa nıet bildirgen tulǵalardyń Respýblıkalyq málimetter banki qalyptasqanyn málimdedi. Jyl saıyn alty myńnan astam bala jasóspirimderdi beıimdeý ortalyqtary arqyly asyrap alýǵa, qamqorlyqqa jáne patronattyq tárbıege beriledi, týǵan ata-analaryna qaıtarylady nemese jetimder men ata-anasynyń qorǵaýynsyz qalǵan balalarǵa arnalǵan mekemelerge jiberiledi. Al jańa týǵan nárestelerdiń ata-anasy anyqtalmaǵan jaǵdaıda, jergilikti atqarýshy organdardyń qorǵanshy jáne qamqorshy organdary sábılerdi birden otbasylaryna tárbıege bere alady. «Barlyq quzyrly memlekettik organdar balalardy asyrap alýǵa, patronattyq tárbıege jáne otbasylaryna berý arqyly jetim balalar úılerindegi tárbıelenýshilerdiń sanyn qysqartý úshin belsendi jumys júrgizýi qajet», - dedi vıse-premer. Sonymen qatar, májilis qorytyndysynda I.Tasmaǵambetov jaýapty qurylymdarǵa Bala quqyqtary jónindegi ýákilmen jáne úkimettik emes uıymdarmen birlesip jetim balalardy qazaqstandyq azamattardyń otbasyna tárbıeleýge berýde úkimettik emes uıymdardyń qatysýy bóliginde zańanamany jetildirý boıynsha usynystar ázirleýdi tapsyrdy.