«Tarbaǵataı juldyzdary» halyqaralyq án festıvali ótti

El Táýelsizdiginiń 25 jyldyǵyna oraı Tarbaǵataı aýdanynda «Tarbaǵataı juldyzdary» án festıvali ótti. Barqytbel baýyrynda tórtinshi márte ótken festıval bıyl alǵash ret halyqaralyq deńgeıde uıymdastyrylyp, shet elderdegi qandastardyń da basyn qosqan óner báıgesine aınaldy. Atap aıtqanda, Reseı, Qytaı, Monǵolııa jáne Qyrǵyzstan, sondaı-aq, elimizdiń Ońtústik Qazaqstan, Qyzylorda, Aqmola, Pavlodar, Shyǵys Qazaqstan oblystarynan 50-den astam ónerpaz saıysqa tústi. Táýelsizdik toıyna arnalǵan festıvalde oryndaýshylar halyq ánderi men Qazaqstan kompozıtorlarynyń týǵan jer taqyrybyndaǵy shyǵar­malaryn shyrqady. Ásirese, Reseıdiń Al­taı aımaǵy Qosaǵash aýdanynan jáne Qytaıdyń ShUAR Altaı aımaǵynan kelgen qandastar «Aǵajaı, Altaı», «Qalqa» syndy ánderdi náshine keltire oryndady. Alataýdyń arǵy jaǵynan kelgen aıyr qalpaqty aǵaıyndar da asqan sheberlik tanytty. Baıqaýdyń ekinshi kezeńine ótken 25 ónerpaz Qazaqstan kompo­zıtorlarynyń keń taraǵan patrıottyq ánderin oryndady. Onyń ishinde Bishkekten kelgen «Zalqar» tobynyń oryndaýyndaǵy  Sh.Qaldaıaqovtyń «Ana týraly» áni tyńdarmandy erekshe baýraı bildi. Sondaı-aq, S.Báıterekovtiń áıgili «Álııa» áni baıqaýda birneshe márte oryndaldy. Tarbaǵataı baýyryn eki kún boıy án-dýmanǵa bólegen baı­qaý qorytyndysy boıynsha festıvaldiń Gran-prı júldesin zaısandyq Ispek Naýryzhan jeńip aldy. Aýdan ákimi Dildábek Orazbaev halyqaralyq festıvaldi ótkizýge at salysqan óner maıtalmandary men kásipkerlerge sheksiz rızashylyǵyn bildirip, baıqaý jeńimpazdary men júldegerlerin marapattady. Dýman ANASh, «Egemen Qazaqstan» Shyǵys Qazaqstan oblysy, Tarbaǵataı aýdany