Jańa tehnologııaǵa súıenedi

Bıyl «Nurly jol» memlekettik baǵdarlamasy aıasynda jylýmen, sýmen jabdyqtaý jáne sý tartý jelisin salý men jańǵyrtý jumystaryn júrgizýge 265 joba usynylyp, sonyń ishinen 99 joba iriktelip alyndy. Atalǵan jobalardy júzege asyrý barysynda 89 shaqyrym jylý júıesi, 816 shaqyrym sýmen jabdyqtaý júıesi, sonymen birge, 277 shaqyrym sý tartý jelisi salynyp, qalpyna keltiriledi. Bul jóninde Turǵyn úı-kommýnaldyq sharýashylyǵyn damytý men jańǵyrtýdyń qazaqstandyq ortalyǵy basqarma tóraǵasynyń mindetin atqarýshy Dastan Hamzın atalǵan ortalyqtyń Aqtóbe qalasynda uıymdastyrǵan aımaqtyq konferensııasy barysynda málimdedi. «Este bolsa, 2015 jyldyń 6 sáýirinde Memleket basshysy «2015-2019 jyldarǵa arnalǵan «Nurly jol» memlekettik baǵ­dar­lamasyn bekitti. Atalǵan baǵdar­lama aıasynda jylý, sýmen jabdyqtaý jáne sý tartý júıesin qalpyna keltirý, salý, jańǵyrtý jobalaryna 2015 jyly Ulttyq qordan 60 mlrd teńge, al 2016 jyly 90 mlrd teńge bólindi. Baǵdarlamaǵa sáıkes, ári qaraı jyl saıyn, kem degende,  jylý, sýmen jabdyqtaý jáne sý tartý júıesin qalpyna keltirý, salý, jańǵyrtý jobalaryna 100 mlrd teńgeden bólý qarastyrylǵan. Investısııalyq jobalardy júzege asyrý barysynda 2020 jylǵa deıin jylý, sýmen jabdyqtaý jáne sý tartý júıesiniń tozý deń­geıin 67 paıyzdan 53 paıyzǵa tómendetý josparlanyp otyr», dedi Dastan Aıtjanuly. Onyń dereginshe, 2015 jyly osy maqsatta usynylǵan 200 jobanyń  92-si iriktelip alynǵan eken. Búginderi 47 joba boıynsha jumys aıaqtalypty. Sońǵy jyldary turǵyn úı-kommýnaldyq sharýashylyǵy sala­syndaǵy jańǵyrtý jumys­tarynyń qarqyn alýyna «Nurly jol» baǵdarlamasynyń mol septigi tıip keledi. Árıne, qan­daı isti de áýeli kadrlar bilik­tiligin arttyryp baryp bastaǵan jón. Bul rette, Turǵyn úı-kom­mýnaldyq sharýashylyǵyn jań­ǵyrtý men damytýdyń qazaq­standyq ortalyǵy jyl saıyn dástúrli túrde óńirlik konferensııalar ótkizýdi qolǵa alǵan. «Bıyl Astana, Aqtóbe jáne Almaty qalalarynda ótken «Tur­ǵyn úı-kommýnaldyq sharýa­shylyǵyn basqarýdyń tıimdi ádisterin qoldaný, ınnovasııa men energııa únemdeý tehnologııasyn engizý negizinde damytý» dep atalatyn óńirlik konferensııalarda «О́ńirlerdi damytýdyń 2020 jylǵa deıingi baǵdarlamasy» men «Nurly jol» memlekettik baǵdarlamasyn júzege asyrý barysy talqylandy. Bul basqosýlardy ótki­zýdegi maqsatymyz – tur­ǵyn úı-kommýnaldyq sharýa­shy­­lyǵy salasynda qyzmet etip júrgen qyzmetkerler men ju­mys­shylardyń bilimi men bilik­­tiligin kóterý, turǵyn úı qoryn, turǵyn úı-kommýnaldyq sharýa­shylyǵyn jańǵyrtý, turǵyn úılerge kúrdeli jóndeý júrgizý, turǵyn úı salasyndaǵy energııa únemdeýdiń tıimdiligin arttyrý», deıdi D.Hamzın. Onyń aıtýynsha, ortalyqtyń muryndyq bolýymen óńirlik konferensııalar men halyqaralyq kórmelerde nemese otandyq óndi­rýshilerdiń óz ónimin nasıhattaý­yna zor múmkindikter beriledi. Sebebi, salany jańǵyrtý ju­mys­­­taryna Qazaqstanda jasalǵan tehnologııalar men jabdyqtardyń paıdalanylýyna múddeli. Bul ári-beriden soń el ekonomıkasyna da septigin tıgizetin qadam.  Aıta ketsek, kúni keshe ǵana Astanada ótken «TKSh EKSPO-2016» halyq­aralyq forýmynda alys-jaqyn shetelden kelgen sala mamandary men otandyq mamandar turǵyn úı-kommýnaldyq sharýashylyǵy salasyndaǵy ınnovasııa,  jańa tehnologııalarǵa negizdelgen energotıimdilik taqyrybyn keńinen sóz etti. Forým aıasynda uıymdas­tyrylǵan kórmege júzden astam taýar óndirýshi qatysty. Solar­dyń biri – besinshi býynnyń jaryqdıodty jaryqtandyrýyn qamtamasyz etýshi «RROLUX LED» JShS. Tıimdiligi joǵary ónimder óndiretin bul kompanııa ónimderiniń balamasy búginderi TMD naryǵynda joq deýge bolady.  Al «APRO-Bıllıng» baǵdarlama keshenin usynǵan «APRO» JShS kommýnaldyq tólemderdi esepteýdi avtomat­tandyrýǵa zor úles qosyp kele­di. Aqparatty naqty jáne jedel óńdeýge, abonentterge jum­salatyn ýaqytty qysqartýǵa, eńbek resýrstaryn únemdeýge, kommýnaldyq qyzmet túriniń kez kelgen túrin eseptep shyǵarýǵa múmkindik beretin baǵdarlama búgingi kúni qajet-aq. Nurlybek DOSYBAI, «Egemen Qazaqstan»