«Altyn adam» syılyǵyn aldy

Astana qalasy Jastar teatrynyń kórkemdik jetekshisi ári bas rejısseri, Qazaqstannyń eńbek sińirgen qaıratkeri Nurqanat Jaqypbaı teatr ónerin damytýǵa qosqan eleýli úlesi úshin bıylǵy «Altyn adam» ulttyq syılyǵyn ıelendi. Rejısserdiń jyl basynan bergi eńbekteri men jetistikteri kórer­men­niń esinde. Aıtalyq, naýryz aıynda Halyqaralyq teatr kúnine oraı uıymdastyrylǵan baıqaýǵa Shekspırdiń «Asaýǵa – tusaý» komedııa­sy­men qa­tysyp, «Jyldyń úzdik rejısseri» ata­lymyn jeńip alǵan-dy. Onymen qosa, «Eńlikgúl-2016» kásibı syılyǵyn enshiledi. Qyrkúıek aıynda Táýelsiz Memleketter Dostastyǵynyń 25 jyl­dyǵyna oraı Belarýs Respýb­lıkasynyń Brest qalasynda ótken «Belaıa Veja» HHI halyqaralyq teatrlar festıvaline Sh.Aıtmatov pen Á.Kekilbaevtyń «Shyńǵyshan» spektaklimen qatysty. Munda da N.Jaqypbaıdyń týyndysy «Eń áserli qoıylym» atandy. Osy aıda el Táýelsizdiginiń 25 jyl­­dyǵyna oraı Aqtóbe qalasynda Qazaqstan drama teatrlarynyń HHIV respýblıkalyq festıvali ótken edi. J.Pılo men O.Shýltezdiń «Mosart» mıýzıklimen baq synaǵan rejısser «Eń úzdik spektakl» júldesin jeńip aldy. Qazan aıynda Taldyqorǵan qalasynda Mádenıet jáne sport mınıstrliginiń qoldaýymen «Qazaqstan – Eýrazııa júregi» atty VI Orta Azııa memleketteri teatrlarynyń halyq­ara­lyq festıvaline Shekspırdiń «Asaý­ǵa – tusaý» komedııasyn alyp bar­ǵan «Altyn adam» syılyǵynyń ıesi bas tuǵyrdan kórindi. Atalǵan qoıylymdardyń barlyǵyn kópshilik Jastar teatrynyń sahnasynan talantty ártisterdiń oryndaýynda tamashalaı alatyndyǵyn aıta ketkimiz keledi. Ashat RAIQUL, «Egemen Qazaqstan»