Asqaq rýhty aqyndar aıtysy

Elimizdiń ár óńirinen kómeıinen jyr saýlaǵan sýyrypsalma aqyndardyń qatysýymen «Asqaq rýhty Atyraý» atty aıtys ótti. El Táýelsizdiginiń 25 jyl­dyq mereıtoıyna arnalǵan aıtystyń ótýine oblystyq ákimdik uıytqy boldy. Aıtysqa qatysqan Alash aqynda­rynyń arasynda osaly joq. Bári de táýelsizdik jyldaryndaǵy eldiń jetistigi men jemisin, sonyń ishinde, Atyraýdyń da órkendeý órisin jy­ryna qosty. Ásirese, Serikzat Dúısenǵazın, Meıirhan Sultanhan syndy aqyndar ózindik maqamymen, óreli oıymen kórermendi bir jel­pintip tastady. Ár sózin astarly ázil­ge quraı biletin Maqsat Aqanov pen Jansaıa Mýsına halyqtyń ystyq yqy­lasyna bólendi. Álbette, jyr saıysyn júrgizgen aqyn Júrsin Ermannyń pikirinshe, aıtystyń da, oǵan qatysatyn aqyn­dardyń da deńgeıi óse túsken. Elimizdiń barlyq óńirinde aqyndar mektebinen tálim alǵan jas aqyndar aıtystarda top jara bastapty. Aqyndardyń ózara sóz saıysyn KSRO halyq ártisi, Memlekettik syılyqtyń ıegeri Asan­áli Áshi­mov tóraǵalyq etken qazylar baǵalady. Aıtystyń bas júldesi – 2 mıllıon teńge qaraǵandylyq Maqsat Aqanovqa berildi. Oǵan bas júldeni tapsyrǵan oblys ákimi Nurlan Noǵaev: «Aqyndar kótergen máseleniń bári de ózekti, biz aldaǵy ýaqytta da aqyndardy qarsy alýǵa daıynbyz» dedi. 1 mıllıon teńgelik sııapaty bar birinshi oryndy Jansaıa Mýsına jeńip aldy. Árqaısysy 800 000 teńgeni quraıtyn ekinshi orynnyń eki júldesi Meıirbek Sultanxan men Baýyrjan Shırmedenulyna berildi. Serikzat Dúısenǵazın, Iranǵaıyp Kúzembaev jáne Jánibek Sadyrov árqaısysy 750 000 teńgeniń úshinshi júldesine ıe boldy. Bul aıtys aqyndardyń eldik, ulttyq múddeni jyryna arqaý etip, eldi birlikke úndeýimen kópshiliktiń esinde qaldy. Joldasbek ShО́PEǴUL, «Egemen Qazaqstan» ATYRAÝ