Mindet aýqymdy, eńbek qarqyndy

Jalpy, jurtshylyqqa ken oryndarynda munaı óndirý tek belgili bir kompanııalardyń ǵana jumysy bolyp kórinýi múmkin, alaıda, qaqaǵan qys pen shilińgir shildede tolas tappaıtyn bul jumys bir kisideı jumylǵan san myńdaǵan adamdardyń eńbegi, birneshe irili-usaqty mekemelerdiń jumylýynyń jemisi. Mańǵystaý óńirindegi munaı óndirý isinde, eńbek ónimdiliginde kompanııalarǵa servıstik qyzmet kórsetetin kásiporyndardyń mańyzy zor. Bul turǵyda biz Bozashy boıyn­daǵy «Qalamqas» ken orny men Jetibaı ken ornyna qurylys baǵyty boıynsha servıstik qyz­met kórsetip kele jatqan «Oil Construction Company» JShS-in ataı alamyz. 2003 jyly «Mańǵys­taýmunaıgaz» AQ-tyń Jetibaı, О́zen, Qalamqas, Qara­janbas sııaq­ty ataqty ken oryndaryn ashý, jaılastyrý jáne ıgerýde basty ról atqarǵan «Mań­ǵystaýmunara» JShS, «Nef­­testroı» JShS, «Mań­­­ǵys­taýmunaıjoldary» JShS syndy úsh iri kásiporynnyń biri­gýi nátıjesinde qurylǵan mekeme qazirgi tańda 2000-ǵa jýyq adamdy eńbekpen qamtyp otyr. Qalamqas qurylys-qurastyrý qyzmeti, Je­tibaı qurylys-qurastyrý qyz­meti, Kólik jáne arnaıy tehnıka qyzmeti, О́ndiristik qamtamasyz etý bazasy sııaqty negizgi tórt bólim­sheden turatyn servıstik kom­panııa Qalamqas jáne Jetibaı ken oryndaryna avtomobıl jáne tehnologııalyq joldar salyp, olarǵa qyzmet kórsetýden bastap, burǵylaýdan shyqqan uń­ǵylardyń basyna terbelmeli qondyrǵylardy qoıý, tok júıesin ornatý, joǵary kerneýli tok baǵanalaryn ornatý, burǵylaýǵa deıingi alańshalardy jasaý, shyny-talshyqty qubyrlar salý, kúshtik jáne energetıkalyq jabdyqtardy qurastyrý, túrli ǵımarattar kesheniniń qurylysy, qubyr oqshaýlaý, jalpy uńǵylaýǵa qatysty qurylys jumystaryn tolyqtaı atqaryp keledi. Álemdik deńgeıde qarjy qyspaǵy ornap, daǵdarys dendegenge deıin ózine júktelgen mindetter men josparlardy minsiz oryndap kelgen servıstik seriktestik bas­shylyǵy zaman talabyna saı jańasha qımyldaý qajet ekendigin uǵyndy. Osylaısha, múmkindikke qaraı qyzmet kórsetý aıasyn ulǵaıtyp, qosymsha qyzmetterdi qosyp atqarýǵa kiristi. Bastama nátıjesiz emes, «izdegenge – sura­ǵan» degendeı, oıǵa alǵan isterin oryndatýǵa ynta bildirýshiler tabyla ketti. Az ýaqyt ishinde Beıneý kentiniń aýylishilik jáne Jyńǵyldy – Taýshyq aralyǵyna gaz jelilerin tartyp, 170 shaqy­rymdyq Taý­shyq – Qalamqas tas­jolyn qal­pyna keltirý, aǵymdaǵy jón­deý jumystaryna qatysty. «О́zenmunaıgaz» ken ornynan munaı quıýǵa jáne saqtaýǵa arnal­ǵan syıymdylyǵy 10 myń tekshe metr jáne 5 myń tekshe metr qazandar ornatyp berse, «QazTransOıl» AQ-qa qaldyq sý­dy qalpyna keltirý, tazalaý qon­dyrǵysy men alańshasyn saldy, «Qarajanbas» ken ornyn­da tok júıesin salýǵa at salysyp, atalmysh kompanııaǵa qaras­ty «Tulparmunaıservıs» JShS-ne fýtbol alańyn saldy. «Mańǵys­taýmunaıgaz» AQ-tyń bastamasymen Qalamqas áýlıeniń basyna túneýhana salynyp, osy attas ken orny men áýlıe arasyna qatqyl tabandy jol tósedi. «Qalamqas» ken ornynda óz­derine júktelgen jumystardy múltiksiz oryndap kele jatqan «Oil Construction Company» JShS-niń Qalamqas qurylys-quras­tyrý qyzmetinde eki aýysymmen 500 adam eńbek etedi. Mańǵystaý oblysynyń aýdan-qalalary men Atyraý, Aqtóbe, Batys Qazaqstan, Qyzylorda jáne Ońtústik Qazaq­stan oblys­tarynan kelip ju­mys isteıtin qyzmetkerler úshin barlyq jaǵ­daı jasalǵan. Ju­mys­shylar úshin zamanaýı úlgi­degi sheshiný-jýyný nysany, eki ashana, tórt jataqhana, fýtbol alańdar men kásipodaq uıymynyń bastamasymen alynǵan trenajerlik jabdyqtar, bılıard, tennıs ústel­deri, «Otaý TV» júıesimen qam­­tylǵan teledıdarlar, or­talyq kitaphana, mádenıet úıi bar. Jumysshylar ózara jáne aýqymdy sporttyq saıystarǵa qatysyp, jyl saıyn munaıshylar merekesi qarsańynda ótetin «Úz­dik maman» baıqaýynda baq synaıdy. Jarystar jeńissiz emes eken, mekeme tórine tizilgen kýboktar men madaqtamalar jarqyn júl­delerden habar beredi. Mekeme basshylarynyń aıtýynsha, «Qalamqas qurylys-qurastyrý» bólimshesi bazasynda joldar úshin arnaıy asfalttar daıyndalady jáne «Qalamqas» ken ornyndaǵy tóselgen tasjoldar túgelge derlik kompanııanyń atqarýymen júzege asyrylýda eken. Sondaı-aq, atalmysh ken ornyndaǵy kompanııanyń qury­lys bólimshesine asfalt jol salýǵa, qubyr tartýǵa, ózge de jumys baǵyt­tarynda qyz­met etetin 140-tan astam tehnıka túri bar, jóndeý baza­sy­men jáne tehnıkalyq qyz­met kór­setý ortalyǵymen «Qalamqas» ken ornyna ornalasqan kólik­jaıda dońǵalaq jóndep, maı bólshekterin jýatyn, akkýmý­lıator jóndeıtin sehtar bar. Qosymsha jumys kózderi ese­binde, bıylǵy jyly kompanııa qyzmetkerleri «Qalamqasta» kúrdeli eki qazan qurylysyn júr­gizse, tórt qazandy kúrdelý jón­deýden ótkizgen. Buǵan deıin olar nemis tehnologııasy negizinde, germanııalyq «Siemens» fır­masynyń jabdyqtaryn or­natqan gaz-trýbınalyq elektr stan­sa­synyń qurylysyna qaty­syp, «Qalamqas» ken ornynyń 40 paıyz elektr energııasymen qam­­tylýyna qol jetkizse, qazir­gi tańda «QazTransOıl» AQ-qa jy­lý qondyrǵysyn ornatý já­ne «QazMunaıGaz» UK» AQ-tyń en­shiles kásiporny, teh­nı­­ka­lyq qyzmet kórsetetin «Oıl­TransportKorporeıshn» me­ke­mesine 400 tehnıkaǵa arnalǵan ga­raj salý jumystaryn qyzý júr­gizýde. 8 karerden qum, ulýtas, mergel, shaqpatas, shoıtas, qumdy maltatas sııaqty qurylys materıaldaryn óndiretin kompanııa «Qalamqas» ken ornynan qum, mergel óndirip keledi. Teńiz sýynyń kóterilýi saldarynyń al­dyn alý maqsatynda sý bógetin sa­lyp, ony turaqty qadaǵalap otyrady. Elimiz uly mereke – Táýel­sizdiktiń shırek ǵasyrlyq mereı­toıynyń tabaldyryǵynda tur. 25 jyl ishinde aıaqtan turyp, álemdik deńgeıde tanylǵan Qazaqstannyń áleýmettik-ekonomıkalyq damýynda tutas halyqtyń, irili-usaq­ty kásiporyndar men jekelegen eńbek adamdarynyń úlesi zor. El eńsesin tiktep, táýelsizdikti baıandy etýge Mańǵystaý dalasynyń qıyr túbindegi ken oryndarynda eńbek etip jatqan qurysh bilekti munaıshylardyń úlesi kóp. О́z isterin jetik meńgergen munaıshylar qaı isti bolsyn she­berlikpen atqaryp, jaqsy ist­er­ge jumylyp keledi. – Jataqhana bar, úsh mezgil tamaq beriledi. Jalaqyny ýaqy­tynda alyp turamyz, jaǵdaıy­myz jaman emes, – deıdi qazan qurylysy basynda júz­des­ken munaıshylar atynan qa­zan qurastyrýshylar Qaı­rat Erekeshov pen Murat Bıse­ke­shov. Salada 2001 jyldan beri eńbek etip kele jatqan olar – óz jumystarynyń besaspap sheber­leri. Olardyń sózin mu­naı salasynda 43 jyl eńbek ótili bar G.Harchenko, qazan qu­ras­tyrýshy D.Tıhomolov, dá­nekerleýshiler V.Pahomov jáne B.Uzaqbaev qostaı tústi. Bir aı nemese aı jarym ýaqytta úlken syıymdylyqtaǵy qa­zandy salyp bitiretin olar kezekti qazan qurylysyn muqııat júr­gizýde. Mindetti servıstik qyz­met­termen birge, qosymsha ju­­mys­tardy atqaryp, kiris kóz­derin ulǵaıta túskendikten, qar­jylyq-eko­nomıkalyq daǵda­rystarǵa qa­ra­­mastan, kompanııa­da ju­mys­shy­larǵa qysqartý júrmegen, ju­mys orny turaqty saqta­lyp keledi. Halyqqa keregi – Táýelsizdiktiń turaq­tylyǵy, tynyshtyq jáne damý. Álem elderinde bolyp jat­qan jaǵdaılar bizge ózimizde bar qundylyqtardy qas­ter­leýge, ba­ǵalaýǵa jáne ony saq­tap qalýǵa múddeli ekenimizdi uǵyn­dyrady. Eren eńbegin el damýyna, halyq nesibesine arnaǵan munaı­shylardyń árbir jumysy – táýelsiz Qazaq­stan­nyń keleshegi úshin qalanǵan kir­pish ekeni anyq. Gúlaıym ShYNTEMIRQYZY, «Egemen Qazaqstan» Mańǵystaý oblysy Sýretterdi túsirgen avtor