El órkendeýiniń qaınar kózi

Memlekettik hatshy Gúlshara Ábdiqalyqovanyń tóraıymdyǵymen Qazaqstan Respýblıkasy Prezıdentiniń janyndaǵy Áıelder isteri jáne otbasylyq-demografııalyq saıasat jónindegi ulttyq komıssııanyń otyrysy ótti. Memlekettik hatshy el Táýel­sizdiginiń shırek ǵasyrlyq mereıtoıyn merekeleý aıasynda «25 juldyzdy kún» bekitilgenin, sol sebepti 2 jeltoqsan otbasy jáne qundylyqtar kúnine arnalǵanyn jetkizdi. Elbasy «Otbasy – ata-analar, balalar men nemereler baqytynyń prızmasy arqyly ótetin patrıotızm men Otan órkendeýiniń máńgilik qaınar kózi», – dep atap ótken bolatyn. Shırek ǵasyrdaǵy tarıhı tabystarymyzǵa sholý jasaǵanda, otbasylyq saıasatty ornyqtyrýdaǵy irgeli isterdi aıryqsha atap kórsetýimiz kerek. Táýelsizdik jyldarynda otbasylyq-demografııalyq saıasat memleket damýynyń strategııalyq baǵyty retinde bekitildi, dedi Gúlshara Naýshaqyzy. Sonymen qatar, ol bul saladaǵy máseleler kezeń-kezeńimen túpkilikti sheshimin taýyp kele jatqanyn aıtty. Bıylǵy jyly elimizde 2006-2016 jyldarǵa arnalǵan genderlik teńdik strategııasy qorytyndylanyp keledi. Atalǵan strategııany iske asyrý barysynda genderlik saıasatty júzege asyrý, bılik pen ekonomıkanyń barlyq salalarynda áıelderdiń rólin kúsheıtý, ana men bala densaýlyǵyn nyǵaıtý sekildi ózekti máseleler qolǵa alyndy. Búginde halyqaralyq talaptarǵa saı, jańa tujyrymdama ázirlenip, ol Elbasynyń qol qoıýyna jiberildi. Tutas bir jyl boıy biz Qazaqstannyń memleket retinde qalyptasýy kezeńindegi qıyndyqtar týraly aıttyq, elimizdiń túrli salalardaǵy jetistikterimen bólistik. Osy jyldary biz qandaı joldardy birge júrip ótkenimizdi sarapqa saldyq, dedi G. Ábdiqalyqova. Otyrysta Qazaqstanda otbasylyq qatynastardy, moraldyq-etı­ka­lyq jáne rýhanı-adamgershilik qundy­lyq­tardy nyǵaıtýdyń 2015-2020 jyldarǵa arnalǵan jalpyulttyq is-sharalar josparynyń iske asyrylý barysy, máselen, balalardyń, onyń ishinde áleý­mettik jaǵynan álsiz býynnyń jaǵ­daıyn jaqsartýǵa, otbasy jáne neke­ni, otbasylyq qundylyqtardy nyǵaı­tý boıynsha halyqtyń biliktiligin artty­rýǵa qatysty máseleler qaraldy. Budan bólek, Memleket basshysynyń tapsyrmasy boıynsha Balalar quqyqtary jónindegi ýákil ınstıtýty qurylǵany, memlekettik bilim berý jınaqtaý júıe­siniń sheńberinde balalar úıiniń 7779 tárbıelenýshisi úshin 5 mıllıard teńge­den astam somaǵa jınaqtaý shottary ashyl­ǵany, patronat, balalardy asyrap nemese qamqorlyqqa alǵan otbasy mem­leket tarapynan materıaldyq tur­ǵyda yntalandyrylatyny aıtyldy. Komıssııa músheleriniń aıtýynsha, Qazaqstan azamattary úshin bala asyrap alý rásimderi ońaılatylyp, bala asy­rap alýdyń halyqaralyq talaptary qatań­datylǵan. Ulttyq komıssııanyń atqarǵan jumystary tek munymen túgesilmeıdi eken. Máselen, elimizde ınklıýzıvtik bi­lim berýdi engizgen balabaqshalardyń sa­ny artyp qana qoımaı, ınklıýzıvtik bilim berýmen mektepke deıingi jastaǵy 14 517 bala qamtylypty. Buǵan qosa, qo­sym­sha bilim berý uıymdarynda múmkin­digi shekteýli 2000-nan astam balaǵa shyǵarmashylyq saýyqtyrý sharalary uıymdastyrylǵan eken. Jıyn barysynda, sondaı-aq, áıelder arasynda júrgizilgen dinı aqparattyq-túsindirý máselesi talqy tarazysyna sa­lyndy. Komıssııa músheleriniń aıtý­yn­sha, 2013-2016 jyldarǵa arnalǵan aqparattyq-túsindirý jumystarynyń aıasynda jalpy sany 5,5 mıllıon adam, olardyń 51 paıyzyn quraıtyn áıel­der úshin 59 myńnan astam is-shara ótki­zilipti. Al qazir Ulttyq komıssııa men óńirler ákimdikteriniń birlesip qolǵa alýymen, «Din jáne áıel» jobasy iske asyrylyp jatyr eken. Ulttyq komıssııa múshelerine jastar arasyndaǵy rýhanı-adamgershilik, ulttyq mádenıet jáne otbasylyq qundylyqtardy nyǵaıtý úshin qurylǵan «Otbasym.kz» ulttyq mýltımedııalyq portaly tanystyryldy. Komıssııa otyrysynyń sońynda Gúl­shara Ábdiqalyqova memlekettik or­gandarǵa birqatar naqty tapsyrma júktedi. Láıla EDILQYZY, «Egemen Qazaqstan» Sýretti túsirgen Erlan OMAROV, «Egemen Qazaqstan»