Úkimet otyrysyn bastamas buryn, Premer-Mınıstr Baqytjan Saǵyntaev Biryńǵaı jınaqtaýshy zeınetaqy qorynyń Ázerbaıjan bankiniń baǵaly qaǵazdaryna salynǵan 250 mıllıon dollar somasyndaǵy qaryzyn qaıtarý týraly máseleni kóterdi.
«Atalmysh másele qoǵam arasynda jıi talqylanyp jatyr. Úkimet otyrysynda osy saýalǵa da toqtalǵandy jón kórdik. «QR Zeınetaqymen qamtamasyz etý týraly» zańy boıynsha, BJZQ-nyń menshik ıesi memleket bolyp tabylady. Memleket zeınetaqy jarnalarynyń qaýipsizdigin qamtamasyz etedi. Sondyqtan azamattardyń zeınetaqy aktıvteriniń saqtalýyna Úkimet tikeleı múddeli. Men ózimniń ázerbaıjandyq áriptesimmen, Premer-mınıstrmen sóılestim. Ol óz kezeginde bank kredıtorlaryna qarajatty qaıtarý prosesine qoldaý kórsetetinin ýáde etti. 23 mamyrda Londonda sheteldik kredıtorlarmen, sonymen qatar QR Ulttyq banki men QR Úkimetiniń ókilderimen bolǵan kezdesýde qaryzdy qaıtarýdyń egjeı-tegjeıli jospary tanystyryldy. Baqyt Turlyhanuly, men Sizge osy másele boıynsha Ázerbaıjannyń Qarjy mınıstrimen sóılesýdi jáne atalǵan saýaldy baqylaýda ustaýdy tapsyrǵan bolatynmyn. Tolyǵyraq baıandama jasaýyńyzdy suraımyn!», - dedi B. Saǵyntaev.
О́z kezeginde B. Sultanov, 2014 jyly qazan aıynda zeınetaqy aktıvteri men Biryńǵaı jınaqtaýshy zeınetaqy qorynyń portfeline halyqaralyq Ázerbaıjan bankiniń 250 mıllıon dollarǵa qaryzdyq baǵaly qaǵazdary 10 jyldyq merzimge jáne 8,25 prosenttik mólsherlememen satyp alynǵanyn eske saldy. Ol kezdegi baǵam boıynsha, bul soma 45 mlrd teńge shamasynda bolǵan.
«QR Ulttyq bankiniń málimetteri boıynsha, 2014 jyldan búgingi ýaqytqa deıin BJZQ Ázerbaıjan bankinen 15 mlrd teńge shamasynda paıda kórgen. Bul - ınvestısııalanǵan somanyń 3/1-i. Ol 52 mln AQSh dollary. Sizdiń tapsyrmańyz boıynsha, men óz áriptesimmen, Ázerbaıjan Qarjy mınıstri Samır Sharıfovpen tildestim. Ol Ázerbaıjan Úkimetiniń atynan osy saýal boıynsha ýákiletti ókil bolyp tabylady. Men ol kisimen árdaıym baılanystamyn. Onyń túsindirýinshe, Ázerbaıjannyń ulttyq valıýtasy - manat devalvasııaǵa ushyraýyna baılanysty, halyqaralyq Ázerbaıjan banki óziniń sheteldik kredıtorlary aldyndaǵy mindettemelerin oryndaýdan bas tartqan. Bul másele Ázerbaıjan úkimetiniń jiti baqylaýynda. Áriptesterimniń aıtýynsha, Ázerbaıjan Úkimeti barlyq kredıtorlardyń múddelerin qamtamasyz etýge daıyn. Biz óz tarapymyzdan QR Ulttyq bank pen QR Úkimeti ókilderiniń tolyq aqparatpen qamtamasyz etilýin suradyq», - dedi Qarjy mınıstri.
«Bizdiń basty maqsatymyz jaǵymsyz saldarlardy meılinshe azaıtý jáne BJZQ salymshylarynyń múddesin qorǵaý, sonymen qatar 250 mln dollar somasyndaǵy negizgi qaryzdyń saqtalýyn qamtamasyz etý. Kelissózder barysyndaǵy bizdiń basty ustanymymyz osyndaı. 23 mamyrda Londonda ótken kezdesýde qaryzdy qaıta qurylymdaýdyń úsh nusqasy aıtyldy. Ázerbaıjan bankiniń 250 mln dollar somasyndaǵy mindettemelerin 5,125 prosenttik mólsherlememen 12 jyldyq merzimge 200 mln dollar bolatyn Ázerbaıjannyń memlekettik baǵaly qaǵazdaryna almastyrý. Ekinshi nusqa - 250 mln dollarǵa para-par 3,5 prosenttik mólsherlememen 15 jylǵa Ázerbaıjannyń memlekettik baǵaly qaǵazdaryna almastyrý. Úshinshi nusqa - osy banktiń 250 mln dollar turatyn jańa shyǵarylǵan oblıgasııalaryn 3,5 prosenttik mólsherlememen 7 jylǵa alý. Barlyq nusqalardy taldaı otyryp, QR Ulttyq banki men Úkimeti ókilderinen quralǵan komıssııa Qazaqstan salymshylary úshin eń tıimdi nusqasy tańdalyp alynady», - dep atap ótti B. Sultanov.
Mınıstrdiń sózinshe, bıyl shilde aıynyń orta tusynda bank kredıtorlarynyń jınalysy ótedi. Onda bank qaryzynyń qaıta qurylymdaýdyń ázerbaıjan tarapy usynǵan nusqalary talqylanady. Eger kredıtorlardyń 3/2-si qaıta qurylymdaý jónindegi sheshimge kelisetin bolsa, bank qaryzyn qaıta qurylymdaý boıynsha jumystar ary qaraı jalǵasyn tabady. Ázerbaıjan tarapy málim etkenindeı, bul jumysty bıyl kúzde aıaqtaý josparda bar.
