Naǵyz alyptar aıqasqa túsken básekede Almaty qalasynyń 8 aýdanynan iriktelip shyqqan 24 balýan óner kórsetti. Tartysqa toly jarystyń aqtyq synynda Naýryzbaı aýdanynyń namysyn arqalap shyqqan Rýslan Abdrazaqov pen Bostandyq aýdanynyń alyby Dáýren Nuralınov beldesti.
Nátıjesinde, Rýslan Abdrazaqov aıqyn basymdylyqpen jeńiske jetip, bas júldege tigilgen «Lada Granta» jeńil kóligin taqymyna basty. Ekinshi orynǵa ıe bolǵan Dáýren Nuralınov 200 myń teńge aqshalaı syılyq enshiledi. Al, byltyrǵy jyly Almaty barysy atanǵan tegeýrindi balýan, Vıktor Demıanenko úzdik úshtikti túıindep 100 myń teńgege ıe boldy.
Osylaısha, Rýslan Abdrazaqov pen Dáýren Nuralınov shilde aıynyń 3-shi juldyzynda ótetin dástúrli «Qazaqstan Barysy» týrnırinde Almatynyń namysyn qorǵaıtyn bolady.
– Jarys joǵary deńgeıde ótti. Qarsylastarym da osal bolǵan joq. Ásirese, Vıktor Demıanenkomen bolǵan beldesý men úshin aýyrǵa soqty. Degenmen, Qudaı ońdap jeńis tuǵyrynan kórindim. Aldaǵy «Qazaqstan Barysy» básekesine tyńǵylyqty daıyndalyp, Almatylyq jankúıerlerdiń seniminen shyǵý úshin barymdy salatyn bolamyn. Uıymdastyrýshylar men jankúıerlerge alǵys bildiremin, – deıdi jarys jeńimpazy Rýslan Abdrazaqov.
Arman OKTIаBR,
«Egemen Qazaqstan»
