Koreıa Respýblıkasynyń elimizdegi Tótenshe jáne ókiletti elshisi Kım De-Sık qos tarap arasynda dıplomatııalyq yntymaqtastyq ornaǵan 25 jyldyń ishinde ózara baılanys tetigi nyǵaıyp kele jatqanyn jetkizdi. «2009 jyldan bastap bizdiń qarym-qatynasymyz strategııalyq áriptestiktiń jańa deńgeıine kóterildi. Búgingi kúnge deıin qos tarap arasyndaǵy saparlar men dostyqqa negizdelgen kelissózder Qazaqstan-Koreıa yntymaqtastyǵynyń tereńdeýine jańasha serpin berdi. Men óz tarapymnan elektrondy úkimet, memlekettik basqarý, adamı resýrstardy basqarý sekildi máselelerdi, jalpy ekijaqty baılanysty kez kelgen salada odan ári damytýdy nazarda ustaıtyn bolamyn. Budan bólek, Qazaqstandaǵy koreı dıasporasy da eki el arasyndaǵy áriptestiktiń jandanýyna serpin berdi, áli de yqpal etip keledi. Qazir Koreıa úkimeti EKSPO-2017 kórmesine belsene qatysýǵa daıyndyq sharalaryn júrgizip jatyr. Kórme aıasynda Koreıa pavılony jańa tehnologııalarǵa negizdelgen ozyq ónimderin jurtshylyq nazaryna usynatyn bolady», – dedi.
Al Serbııa Respýblıkasynyń Tótenshe jáne ókiletti elshisi Vladan Matıch sońǵy birneshe jyldar boıy qos memleket qarym-qatynasynyń qarqyn ala túskenine, Serbııa úshin Qazaqstan Ortalyq Azııadaǵy mańyzdy seriktesterdiń biri ekenine toqtaldy. Ol: «Biz Qazaqstannyń syrtqy jáne ishki saıasatyn qoldaımyz. Men óz tarapymnan búgingi kúnge deıin júrgizilgen jumystardy odan ári jalǵastyrýǵa kúsh salatyn bolamyn», – dedi óz sózinde.
Indonezııa Respýblıkasynyń Tótenshe jáne ókiletti elshisi Rahmat Pramono men Rýmynııanyń Tótenshe jáne ókiletti elshisi Chezar-Manole Armıaný da áriptesteriniń sózin qýattady. Máselen, Rahmat Pramono Indonezııanyń Qazaqstanda búgingi kúnge deıin taǵaıyndalǵan ekinshi Tótenshe jáne ókiletti elshisi eken. Jalpy, bul elmen dıplomatııalyq baılanys 1993 jyldyń 2 maýsymynda ornasa, Indonezııanyń Astanadaǵy elshiligi 2010 jyldyń jeltoqsan aıynda ashyldy. О́z sózinde Rahmat Pramono: «Búginde Qazaqstan BUU Qaýipsizdik keńesiniń Turaqty emes músheligine saılanýy arqyly álemde beıbitshilik pen tynyshtyqtyń ornaýyna kúsh salyp keledi. Oǵan Sırııada qalyptasqan jaǵdaı boıynsha Astanada beıbit kelissózderdiń júrgizilýi – dálel. Sol sebepti, Indonezııa Qazaqstannyń óńirdegi turaqtylyqpen qatar, dúnıejúizindegi qaýipsizdiktiń nyǵaıýyna qosyp otyrǵan úlesin joǵary baǵalaıdy. Jalpy, eki memleket áriptestiginiń damý áleýeti joǵary. Qos el qarym-qatynasyna bıznesmenderdiń júrgizgen ózara kelissózderi de tyń serpin beredi dep oılaımyn. Aldaǵy ýaqytta Indonezııanyń 2 kompanııasy farmasevtıka jáne taý-ken salalaryna ınvestısııa quıýdy kózdep otyr», – dese, Rýmynııanyń Tótenshe jáne ókiletti elshisi Chezar-Manole Armıaný Qazaqstan men Rýmynııa bıyl 15 shildede dıplomatııalyq baılanystyń ornaýynyń 25 jyldyǵyn atap ótetinin atap ótti.
«Qazirgi tańda qos memleket arasynda dıplomatııalyq deńgeıde kóńil tolarlyqtaı qarym-qatynas, al prezıdenttik, parlamenttik, úkimettik deńgeıde joǵary saıası únqatysý ornaǵan. Budan bólek, ekonomıkalyq yqpaldastyq máselesinde ózara senim bar, mádenı, bilim-ǵylym salalarynda jaqsy deńgeıdegi áriptestik jolǵa qoıylǵan. Men aldaǵy ýaqytta ekijaqty kelissózder kókjıeginiń keńeıýine, onyń ishinde ekonomıka, saýda, ınnofasııalyq tehnologııalar, adamı resýrstardy basqarý, bilim-ǵylym, mádenıet pen sport salalaryndaǵy baılanysty jandandyrý jolynda eńbek etetin bolamyn», – dedi Chezar-Manole Armıaný.
Láıla EDILQYZY,
«Egemen Qazaqstan»
