– Azamat myrza, komanda qaı jyly otaý tikti?
– Ol jaıly tereńnen aıtar bolsaq, Tımırıazev aýdanynda eginshilikpen aınalysatyn sharýa qojalyǵynyń basshysy Qaıyrbek Hamzındi aldymen aýyzǵa alarymyz zańdy. О́ıtkeni, qaıyrymdy isi mol, saýapty sharalardan esh tartynbaıtyn aıtýly azamat jergilikti voleıbolshy qyzdarǵa únemi qoldaý kórsetip, qarjylyq demeý jasap júrdi. 2010 jyly oblystyq deńgeıdegi myqtylar sanatyna qosylý kerek degen ıdeıaǵa bastamashy bolyp, «Qýanysh jáne K» komandasyn qurdy. Onyń quramyna Aqsýat, Stepnoe, Tımırıazevo, Dmıtrıevka eldi mekenderinen sportqa beıimi bar 7-8 synyp oqýshylary tartyldy. Ol kezde men aýdandyq balalar jáne jasóspirimder mektebinde jattyqtyrýshy jáne gımnazııa mektep-ınternatta dene shynyqtyrý pániniń muǵalimi bolyp isteıtinmin. Arada úsh jyl ótkennen keıin 1995 jyly týǵandar arasynda oblysta jeńistiń eń bıik tuǵyryna kóterildik. Aqtyq básekede azýly qarsylastarymyzdyń biri – Qyzyljar aýdanynyń komandasyn utyp, chempıondyq tájdi qanjyǵamyzǵa óńgerdik.
Búginde komanda oblystyq bıýdjet esebinen qarjylandyrylatynyna qaramastan, Qaırekeń demeýshilikten qol úzgen joq. Ol qazir «Qýanysh» degen ataýǵa ıe voleıbol komandasynyń dırektory retinde Reseıde ótetin jarystarǵa júıeli qatysýymyzǵa, sporttyq kıimdermen, qural-jabdyqtarmen qamtamasyz etilýimizge jan-jaqty qamqorlyq kórsetip júr. Ulttyq lıgaǵa ótýimizge ol kisi zor eńbek sińirdi.
– Baıraqty básekelerge qaı kezden bastap qatysyp kelesińder?
– Alǵash ret jolymyz 2011 jyly tústi. Ekibastuz qalasynda 1994-95 jyly týǵandar arasynda Qazaqstan kýbogy úshin ótken jarysta V. Shmelev baptap aparǵan komanda jaqsy qyrynan tanyldy. Al meniń jattyqtyrýymdaǵy komanda (1996-97 jyly týǵandar) birinshi oryndy enshiledi. Reseıden de shaqyrtýlar az emes. Olardyń ishinde eń aıtýlysy – Orynbor oblysynda uıymdastyrylatyn «Sol-Ilesk» halyqaralyq týrnırine úzbeı qatysyp kelemiz. Kúmis júldeger boldyq.
2012/13 jylǵy maýsymda joǵary lıganyń «V» tobynda óner kórsetip, 3-shi oryndy ıelendik. 2014 jyly Temirtaýdyń «Metallýrginen» bir upaı artyq enshilep, chempıon atandyq. «A» tobynda 5-shi, keıin 3-shi orynǵa turaqtadyq. Al, jýyrda aıaqtalǵan HHV respýblıkalyq chempıonatta bir ǵana jeńilis taptyq. Osylaısha, Ulttyq lıgada óner kórsetý mártebesin ıelendik. Munda «Altaı», «Ertis», «Jetisý» sekildi óte tegeýrindi komandalarmen kúsh synasýǵa týra keledi.
– О́zindik oıyn órnegimen erekshelenip júrgen burymdy voleıbolshylardy ataı ketseń?
– Voleıbol komandalyq oıyn bolǵandyqtan, ár oıynshynyń óz orny bar. Desek te, Polına Kostıva, Nurıla Aqjanova, Margarıta Belchenko, Farıda Ramazanova, Saltanat Qoshqarbaevanyń esimderi komandanyń irgetasyn qalaýshylardyń qatarynda úlken maqtanyshpen atalady. Bular sońǵy el birinshiliginde de tamasha oıyn mánerimen tanyldy. Aınur Esentaeva, Anastasııa Nazarova da bolashaǵynan mol úmit kúttiredi. Olesıa Varkentın, Valerııa Artamoshına jasóspirimder quramasynda jaqsy qyrynan tanylyp júr. Azııa birinshilikterine qatysyp qaıtty. Polına bıyl jastar quramasy sapynda Taılandta ótetin Azııa chempıonatyna barady.
– Sportqa mamandandyrylǵan oblystyq mektep-ınternat janynan voleıbol bólimshesi ashylǵaly komanda rezervtik jaǵynan nyǵaıa túsken sekildi.
– Durys aıtasyz, búginde negizgi materıaldyq bazamyz osynda ornalasqan. Qazir munda jas erekshelikterine baılanysty úsh top jattyǵady. Olardy Rýslan Maldybaev, Vladımır Perepechın jáne men baptaımyz. Bólimshede óńirdiń ár qıyrynan kelgen 30-ǵa jýyq qyz bala voleıboldyń qyr-syryna úırenedi. Oǵan 7-synyptan bastap qabyldanady. Negizgi quramada oınap júrgen Olesıa Varkentın, Narǵyz Ortanova, Krıstına Sorokına, Dılbara Amanova osy bólimsheniń túlekteri.
– Tómengi synyptardan qabyldaýǵa bolmaı ma?
– Reseıde birinshi synyptan qabyldaıdy. Biz máseleni tıisti oryndar aldyna qoıyp, ońtaıly sheshilýine kúsh salyp jatyrmyz.
– Áńgimeńe rahmet. Jeńisti bıikterden kórine berińder!
– Aıtqanyńyz kelsin! Kúzde Qazaqstan kýbogy úshin tartys bastalady. Qazir soǵan daıyndalýdamyz. 2015 jyldan beri ǵana kásibı klýb sanatyndamyz. Tájirıbeniń azdyǵyna qaramastan, Ulttyq lıgada da namysty qoldan bermeýge tyrysamyz.
Áńgimelesken
О́mir ESQALI,
«Egemen Qazaqstan»
Soltústik Qazaqstan oblysy
