Qazirgi tańda aldynan shyqqan qaterlerdi eńserý úshin AQSh-qa aldymen ıntellektýaldy merıtokratııa qajet. Sarapshynyń pikirinshe, qazir AQSh-tyń eń negizgi «bas aýrýlary» Qytaıdyń kúsheıýi, Taıaý Shyǵystaǵy Reseı qaýpi men «ishten shirigen» transatlanttyq alıans.
Osy máselelerdiń bárin sheshý úshin AQSh-qa qazir saraptama men batyldyq kerek. Al bul eki qasıet te qazir Vashıngtonda baǵalanyp otyrǵan joq.
«Qyrǵı-qabaq soǵys kezinde Bjezınskıı sekildi saıasatker ǵana bıliktiń joǵary eshelonyna shyǵa alar edi. Keńes qaýpinen seskengen AQSh sol kezde álem boıynsha eń úzdik degen mamandardy ózine tartty. Bjezınskııdiń ulty polıak bolǵanymen, orys álemin tereń túsinýi AQSh úshin óte kerek edi» dep jazady Edýard Lıýs.
Degenmen, qazirgi AQSh baıaǵydaı emes. Búgin AQSh-ta Bjezınskıı men Kıssındjerler sekildi prezıdentterge keńes bere alatyn mamandar bar ma degen saýalǵa jaýap izdegen sarapshy AQSh-taǵy ashyqtyq saıasatyn alǵa tarta otyryp, áli de bolsa AQSh ondaı mamandardy tárbıelep shyǵa alatynyn aıtady.
«Degenmen, siz ondaı mamandardy Vashıngtondaǵy advokattyq keńseler men zertteý ınstıtýtynan taba almaısyz. Bjezınskııdi ósirgen AQSh táýelsiz oılaıtyndardy baǵalaýshy edi. Al qazir aǵysqa qarsy júretin qaıratkerlerdiń Vashıngtonda baǵalanýy ekitalaı» dep jazady Edýard Lıýs Financial Times basylymynda.
