Jeńis Qasymbek mınıstrliktiń atqarǵan jumys nátıjelerin baıandap, bıylǵy jyldyń sońyna deıin júzege asyrylatyn jobalarǵa jáne aldaǵy josparlar men mindetterge toqtaldy.
Eseptik jıyn aımaqtardyń qatysýymen beınekonferensııa rejıminde ótti. Mınıstr óz baıandamasynda 2017 jyldyń 4 aıynyń qorytyndysy boıynsha óndiristik ónerkásip kólemi 7,1%-ǵa óskenin aıtty. Onyń ishinde taý-ken óndirý ónerkásibi (+7,8%), óńdeý ónerkásibi (+6,8%), tústi metallýrgııanyń ósimi esebinen (+7,9%), qara metallýrgııa (+9,3%) jáne farmasevtıka (+49,7%) ósip otyr.
2016 jyly Indýstrııalandyrý kartasy aıasynda quny 878 mlrd. teńge bolatyn 130 joba iske qosylyp, 10 myń turaqty jumys orny ashyldy. Karta jobalary ótken jyly 2,2 trln. teńgeniń ónimin óndirdi. Onyń 1,4 trln. teńgesi óńdeý ónerkásibine tıesili. Bıyl jalpy somasy 700 mlrd. teńge bolatyn 100-den astam joba júzege asyrylady. Bul jobalar arqyly taǵy da 10 myń turaqty jumys orny ashylady.
Bıyl ındýstrııa 4.0 elementterin engizý aıasynda júıeli sharalar paketin jáne ónerkásipti sıfrlandyrýda memlekettik qoldaý quraldaryn ázirleý boıynsha (zańnamalyq ózgerister, standarttaý jáne taǵy basqalar) jumystar júrgiziledi.
2016 jyldyń qorytyndylary boıynsha tikeleı sheteldik ınvestısııa (TShI) 40% ósip, 20,6 mlrd. AQSh dollaryn qurady (2015 j. – 14,7 mlrd. doll.). Birlesken jumystardyń nátıjesinde bıyl aqpan aıynda EYDU keńesi Qazaqstannyń EYDU halyqaralyq ınvestısııalar jáne kópultty kásiporyndar jónindegi deklarasııasyna qosylýyn, sondaı-aq, EYDU ınvestısııa jónindegi komıtetine «qaýymdastyrylǵan múshe» retinde kirýin maquldady.
Innovasııa salasynda 2016 jyly jalpy somasy 1,9 mlrd. teńgege ınnovasııalyq granttar berý týraly 66 kelisimge qol qoıyldy. Halyqaralyq tehnologııalar transferi ortalyǵynyń yqpalymen Qazaqstanǵa sheteldik tehnologııalardy transferleý boıynsha 15 jobany júzege asyrý qolǵa alyndy. Irikteý nátıjesinde 4 jobaǵa jalpy somasy 800 mln. teńgeniń ınnovasııalyq granty berildi. 2017 jyly Memleket basshysynyń Joldaýyn júzege asyrý aıasynda atalǵan ortalyqtyń 2 pılottyq jobasyn júzege asyrý josparlanǵan.
Tehnıkalyq retteý jáne metrologııa salasynda EAEO-nyń 40 tehnıkalyq reglamenti bekitildi, onyń 35-i kúshine endi. Standarttaý jónindegi josparǵa sáıkes, 747 ulttyq standart ázirlendi. Qazaqstan Ortalyq Azııa aýmaǵy elderi ishinde birinshi bolyp 58 ólsheý málimetteriniń (salmaq, qattylyq, temperatýra, ýaqyt pen jıilik, uzyndyq, rN ólshemi) halyqaralyq standarttarǵa sáıkestigin dáleldedi.
Mınıstrlik 2016 jyly «Jer qoınaýy jáne jer qoınaýyn paıdalaný týraly» QR Kodeksiniń jobasyn ázirledi. Qazirgi ýaqytta joba jumys tobynyń qaraýynda jáne bıylǵy jyldyń sońyna qaraı qabyldaý josparlanyp otyr. Kodekstiń qabyldanýy geologııalyq barlaýdyń ınvestısııalyq tartymdylyǵyn arttyryp, otandyq ıýnıorlyq kompanııalardy damytýǵa jáne qosymsha ınvestısııa tartýǵa tyń serpin beredi, sonymen birge eldegi áleýmettik-ekonomıkalyq ahýalǵa oń yqpal etedi.
2016 jyly kólik salasynda qyzmet kórsetý kólemi 3,8%-ǵa ósti. Logıstıka tıimdiliginiń halyqaralyq reıtınginde Qazaqstan 88 orynnan 77 orynǵa kóterildi (TMD-da úzdik boldy). Qytaı-Eýropa-Qytaı baǵytynda tranzıtti konteınerlik tasymal 2 ese ósip, 104,5 myń konteınerdi qurady (2015 jyly 47,3 myń).
2017 jyly konteınerler sanyn 320 myń birlikke deıin, onyń ishinde Qytaı-Eýropa-Qytaı baǵyty boıynsha 165 myń konteınerge arttyrý kózdelip otyr (Qazaqstan aýmaǵy arqyly 11 baǵyt boıynsha shamamen 100 konteınerlik poıyz ótedi).
Tranzıttik avıajolaýshylar sany 2016 jyly 250 myńnan 478 myńǵa deıin jetti. 2017 jyly olardyń sany 600 myńǵa jetedi dep josparlanǵan. Negizgi jolaýshylar legin Azııadan Qazaqstan arqyly Eýropaǵa jáne keri baǵytta qatynaıtyndar quraıdy.
2016 jyly «Nurly jol» baǵdarlamasy aıasynda respýblıkalyq mańyzy bar 920 shaqyrym avtokólik joldaryndaǵy jóndeý jumystary aıaqtaldy, sondaı-aq, onyń 767 shaqyrymy paıdalanýǵa berildi. Jobany júzege asyrý úshin 75 myń adam jumyldyryldy. 2017 jyly bólingen qarjy esebinen 7 ótpeli jobalardyń jumysy jalǵasyp (Astana-Qaraǵandy, Ortalyq-Shyǵys, Beıneý-Aqtaý, Ortalyq-Batys, Qapshaǵaı-Taldyqorǵan, Astana–Petropavl jáne Oral-Kamenka), jyl sońynda sonyń 602 shaqyrymyndaǵy jumystar aıaqtalady dep josparlanyp otyr.
Sondaı-aq, jalpy uzyndyǵy 3,2 myń shaqyrymdy quraıtyn 15 jańa jobanyń qurylysy bastalady. Jalpy alǵanda, bıyl 4,4 myń shaqyrym jolǵa jumys júrgizilip, 100 myń adam jumyldyrylady.
2016 jyly jalpy turǵyn úı qurylys alańynyń fızıkalyq kólem ındeksi 118%-dy qurady. 10,5 mln.sharshy metr turǵyn úı paıdalanýǵa berildi. Bul shamamen 90 myń baspana. Bul sala boıynsha ınvestısııa kólemi 2015 jyly 740 mlrd. teńge bolsa, 2016 jyly 830 mlrd. teńgege jetti. Júrgizilgen reformalar nátıjesinde kásipkerler úshin qurylys júrgizýge ruqsat alý merzimi 3 aıdan 1 aıǵa deıin qysqardy. Atalǵan kórsetkishter boıynsha 2 jylda Qazaqstan Búkilálemdik Bank reıtıngisinde 152 orynnan 22 orynǵa kóterildi.
«Nurly jer» turǵyn úı qurylysynyń biryńǵaı baǵdarlamasy ázirlenip, onyń aıasynda 1,5 mln. turǵyn úı salynatyn bolady. Al, 2017 jyly 100 myń turǵyn úı salý josparlanyp otyr.
