Baspasóz ortalyǵynda ótken basqosýda malaızııalyq pavılon dırektorynyń orynbasary Lý Týk Gı «1 post = 1 Vatt» naýqandyq sharasynyń jarııalanǵanyn málimdedi.
Belgilengen shartqa saı, sharada árbir qatysýshysy «Facebook», «Instagram» jáne «VK» áleýmettik jelilerine jasyl energetıka, jasyl tehnologııa taqyryptarynda post jarııalap, ony #MyButterflyEffect heshtegimen belgilep, kórsetýleri kerek. Uıymdastyrýshylar osyndaı qadammen álemde jasyl tehnologııalar ıdeıasyn nasıhattamaq.
Pavılonnyń baspasóz qyzmetkeri Málik Kóshmuhanovtyń aıtýynsha, jasyl tehnologııa jáne kún energııasy taqyrybynda áserli post jazǵan Qazaqstannyń 2 azamaty elordada ótip jatqan EKSPO-2017 kórmesin tegin tamashalaı alady. Baıqaý sharttaryn egjeı-tegjeıli túsindirgen ol bylaı dedi: «Áleýmettik jelide jasyl tehnologııalar jáne kún energııasy jaıynda bir post jazyp, #MyButterflyEffect heshtegin kórsetý qajet. Maqsat – jasyl energııa kózderiniń tıimdiligin pash etý. Eń áserli post jazǵan eki qazaqstandyq halyqaralyq kórmege tegin qatysyp, qyzyqtaı alady. Barlyq shyǵyndy, ıaǵnı Astana qalasyna kelip-qaıtý jolaqysyn, EKSPO-2017 halyqaralyq kórmesine kirý bıletin Malaızııa ókildigi kóteredi. Oǵan elimizdiń kez kelgen turǵyny qatysa alady. Olar úshin baıqaý 30 shildede aıaqtalady».
Atalǵan sharaǵa Malaızııa azamattary da qatysa alady. Olarǵa da qoıylatyn talaptar joǵarydaǵydaı. Alaıda, malaızııalyqtar úshin baıqaý 10 shildede aıaqtalady.
Ashat Raıqul,
«Egemen Qazaqstan»
Derek pen dáıek
● Malaızııa – eń iri orman alqaptary bar elderdiń ishinde birinshi orynda.
● Naryqtyq damýy jaǵynan álem elderiniń qatarynda tórtinshi oryndy enshileıdi.
● Jasyl energetıka óndirý boıynsha kóshbasshy sanalady.
● Malaızııa – dúnıe júzindegi fotoelektrlik modýlder men uıashyqtaryn óndirýshilerdiń biri.
● Jer betindegi árbir fotoelementtiń tórtinshisi osy memleketten shyǵady.
