Elbasynyń taıaýda jarııalaǵan «Bolashaqqa baǵdar: rýhanı jańǵyrý» atty baǵdarlamalyq sıpattaǵy maqalasynda «Týǵan jer» baǵdarlamasyn qolǵa alýdy usynǵan bolatyn. Memleket Basshysy otansúıgishtik sezimdi kindik qanyń tamǵan topyraǵyńa, ósken aýlańa, qala men óńirińe, ıaǵnı týǵan jerińe degen mahabbattan bastalatynyn qadap aıtqan bolatyn. Osy turǵyda Oktıabr aýdanynda «Týǵan jer» baǵdarlamasynyń aıasymen «Bar jaqsylyq – balalarǵa!» atty aksııa ótýde. «Týǵan jer» baǵdarlamasyn qaraǵandylyq boksshy Gennadıı Golovkın de qoldady. Onyń dáleli, búgingi ashylyp otyrǵan «Juldyzaı» zamanaýı oıyn kesheni. Igi sharanyń ashylý saltanatynda Oktıabr aýdanynyń ákimi Álimjan Qanaev jáne Qaraǵandy qalalyq máslıhatynyń depýtaty Danııar Isaev sóz sóıledi.
Bul bastama el matanyshy GGG-diń jýyrda týǵan jerge at basyn tiregen ýaqytta kóterilgen bolatyn. Oblys ákimi Erlan Qoshanovpen jeke kezdesken boksshy Qaraǵandyda balalar sport alańyn turǵyzatynyn jetkizgen edi.
Jańa alań Maıqudyqtaǵy 14-shi shaǵyn aýdanda salynady degen boksshy qurylys jumystary chempıonnyń esebinen júrgiziletinin de aıtyp ótken bolatyn.
– El Prezıdenti «Bolashaqqa baǵdar: rýhanı jańǵyrý» atty maqalasynda «Týǵan jer» baǵdarlamasy tamasha bastama! – dedi boksshy, – Men de qýana-qýana bul baǵdarlamaǵa qosylamyn. О́zim bir kezderi turǵan, ósken úıdiń aýlasynda balalar sport alańyn turǵyzyp bergenim durys dep oılaımyn. Elbasynyń bastamasyn tolyǵymen qoldaımyn.
Mıras ASAN,
«Egemen Qazaqstan»
Qaraǵandy oblysy
