Elbasy dóńgelek ústel jıynyna qatysýshylarǵa 10-shy Astana ekonomıkalyq forýmyna kelgenderi úshin rızashylyq bildirdi.
– Sarapshylarmen júzdesip, áńgimelesý árdaıym asa mańyzdy ári qyzyqty. Ásirese, qazir álemde eleýli ózgerister bolyp jatqanda munyń mańyzy zor, – dedi Qazaqstan Prezıdenti.
Nursultan Nazarbaev jahandyq tehnologııalyq damý zor qarqyn alyp otyrǵanyna toqtalyp, Halyqaralyq «EKSPO-2017» mamandandyrylǵan kórmesiniń taqyryby ózekti ekenin atap ótti.
– Kórmeniń arqasynda Qazaqstan jańa tehnologııalardyń damýy turǵysynan álem nazaryn ózine aýdaryp otyr. Soǵan qarap qorshaǵan ortamyz qalaısha túbegeıli ózgerip otyrǵanyn kóre alamyz. Elektromobılderdi, ózdiginen júretin kólikti, nanotehnologııalardy, sondaı-aq jańa energııa túrlerin biz fýtýrıstik dúnıeler dep sanaıtynbyz. Qazir sonyń bári shyndyqqa aınalýda, – dedi Memleket basshysy.
Nursultan Nazarbaev ilgerileýge yqpal etetin kún tártibindegi halyqaralyq ózekti máselelerge toqtalyp, jahandyq problemalardy sheshý úshin kúsh-jigerdi jumyldyrý qajettigin atap ótti.
– AQSh-tyń Parıj kelisiminen shyǵatyny týraly málimdeme, Katardyń tóńiregindegi jaǵdaı ornyqty damýdy kúrdelendire tústi. Túrli elderdegi ekologııalyq problemalar, jahandanýǵa qarsylyq úderisi, kóshi-qon aǵyny men paternalızm saýda jasaýǵa, ózara qarym-qatynasqa jáne ıntegrasııaǵa kedergi keltirýde, – dedi Memleket basshysy.
Kezdesý barysynda A.Kvasnevskıı, S.Mesıch, S.Tımashev, R.Chýng, D.Frenkel, A.Spısyn, D.Daokýı Lı, I.Sakong, P.Tıchanskıı, D.Perkıns, D.Garold, N.Taleb, H.Bıýrkner baıandama jasady.
Sońynda Qazaqstan Prezıdenti dóńgelek ústel jıynyna qatysýshylarǵa áńgimeniń mazmundy bolǵany úshin alǵys aıtyp, ózekti máselelerdi Astana ekonomıkalyq forýmy aıasynda talqylaýdy usyndy.
