Bul týraly Astana ekonomıkalyq forýmy aıasynda ótken «Orta kiristiń tuzaǵy»: Qazaqstan úshin másele» atty paneldik sessııada Reseı ǵylym akademııasynyń akademıgi Sergeı Glazev aıtty, dep habarlaıdy Abctv.kz.
Onyń sózinshe, bul saıasattyń benfısıary – qarjy alypsatarlary. Erkin aınylymdaǵy teńge baǵamy arqyly ınflıasııamen kúresý qısynsyz sharýa.
«Qazaqstan naryǵynda alypsatarlar basym bolyp tur. Reseı naryǵynda valıýtany satý-satyp alý boıynsha kelisimniń 90%-y alypsatarlarmen jasalady. Eger Ortalyq bank valıýta baǵamyn retteýmen aınalyspaıtyn bolsa, onda baǵamdy alypsatarlar qalyptastyrady. Olar valıýta baǵamyn aıla-sharǵy arqyly, ıaǵnı ony birese túsirip, birese kóterip, paıda tabady. Osyndaı jaǵdaıda valıýta baǵamyn ustap turý úshin OB joǵary paıyzdyq mólsherlemeni, qundy qaǵazdardyń joǵary tabystylyǵyn ustap turýǵa májbúr», – dedi Sergeı Glazev.
Sóz arasynda ol qarjy-alypsatarlyq kóbik qoldan jasalatynyn aıtty.
«Sheteldiń alypsatarlary tabysty sanaı bastaǵanda, naryqtan kerrı treıd kele bastaıdy, aqyr sońynda munyń barlyǵy qarjy naryǵynyń quldyraýyna, valıýtanyń qunsyzdanýyna jáne jańa ınflıasııalyq tolqynnyń paıda bolýyna alyp keledi. О́kinishke qaraı, bul saıasat halyqaralyq alypsatarlar qaýymdastyǵynan qoldaý taýyp otyr. Olar osy saıasatty únemi maqtaı jóneledi. Tipti osyny jasaǵandarǵa eń úzdik bankır ataǵy berilýde. Al ekonomıka úshin bul úlken kúıreý», – dedi Reseı ǵylym akademııasynyń akademıgi.
