Bári taqyr jerden bastaldy
25 jyl buryn, 1992 jylǵy 2 shildede Memleket basshysy «Qazaqstan Respýblıkasynyń Syrtqy ister mınıstrligi týraly», «Qazaqstan Respýblıkasynyń elshiligi týraly» jáne «Qazaqstan Respýblıkasynyń tótenshe jáne ókiletti elshisiniń negizgi mindetteri men quqyqtary týraly» erejelerdi bekitken birneshe Jarlyq qabyldady. Osylaısha tolyqqandy Syrtqy ister mınıstrligi – dıplomatııalyq qyzmettiń ortalyq organy quryldy.
Resmı túrde Qazaq KSR Syrtqy ister mınıstrligi 1944 jyldan beri bar, Birikken Ulttar Uıymy qurylar qarsańda Keńes ókimeti Odaqtyq respýblıkalar esebinen jańa jahandyq uıym quramynda «táýelsiz» oryndardy kóptep ıemdenýdi maqsat tutty. Nátıjesinde BUU-ǵa KSRO-dan soǵystan meılinshe zardap shekken keńestik respýblıkalar retinde Ýkraına men Belarýs kirdi. Sany jaǵynan az Qazaq KSR Syrtqy ister mınıstrliginiń qyzmeti negizinen hattamalyq fýnksııalarmen jáne respýblıkamyzdyń sheteldermen belgili bir deńgeıdegi mádenı baılanystarymen shekteldi. Tolyqqandy dıplomatııa keńestik respýblıkanyń atrıbýty bola almady.
Degenmen, Qazaqstannyń syrtqy saıasat vedomstvosy kezeńi týraly aıtqanda, Qazaq KSR Syrtqy ister mınıstrliginiń 1944 jyldan bastap táýelsizdik alǵanǵa deıingi barlyq basshylaryna laıyqty baǵasyn berýimiz kerek. Olar elimizdiń kórnekti memleket qaıratkerleri jáne halqymyz zııalylarynyń jarqyn ókilderi boldy. Atap ótsek, Tólegen Tájibaev, Qaıyrǵalı Baıǵalıev, Asqar Zakarın, О́teshqalı Atambaev, Ádı Sháripov, Baljan Bóltirikova,
Málik Fazylov, Músilim Bazarbaev, Mıhaıl Esenálıev. Olar Keńes Odaǵynyń syrtqy qatynasynda bizdiń respýblıkamyzdy laıyqty deńgeıde kórsete bildi, sheteldik iri delegasııalardy qabyldap, BUU Bas Assambleıasynyń minberinen sóz sóıledi.
Alaıda, Qazaqstan 1991 jylǵy 16 jeltoqsanda, memlekettik táýelsizdigimiz jarııalanǵannan keıin ǵana halyqaralyq qatynastardyń tolyqqandy qatysýshysyna aınaldy. Sondyqtan 1992 jylǵy 2 shildedegi jarlyqtar Syrtqy ister mınıstrligin ınstıtýttandyrýdyń, Qazaqstannyń búkil álem boıynsha dıplomatııalyq ınfraqurylymyn qalyptastyrýdyń qajetti irgetasy boldy. Dál osy kezde Syrtqy ister mınıstrligine Qazaqstan Respýblıkasynyń memlekettik basqarý ortalyq organdarynyń halyqaralyq qyzmetin úılestirý róli júkteldi.
Aıqyn mindetter qoıylǵan da osy kez edi. Naqtylaı tússek, vedomstvoǵa maquldanǵan halyqaralyq quqyq normalaryna sáıkes barlyq shet memlekettermen teń quqyly qarym-qatynastardy damytý, Qazaqstan Respýblıkasyn jan-jaqty ilgeriletý úshin beıbit jaǵdaı qalyptastyrý, eldiń saýda-ekonomıkalyq saıasatyn júzege asyrýǵa, álemdik sharýashylyq baılanystarǵa qatysýyna járdemdesý, shetelderden kapıtal tartý sııaqty mindetter júkteldi.
Prezıdent jańa Syrtqy ister mınıstrliginiń negizgi fýnksııalaryn anyqtady, onyń eń mańyzdylary «egemendikti qorǵaýdyń dıplomatııalyq quraldarymen jáne ádisterimen qamtamasyz etý, aýmaqtyq tutastyqty, Qazaqstan Respýblıkasy shekarasynyń qaýipsizdigi men qol suǵylmaýshylyǵyn, halyqaralyq arenadaǵy múddesin qamtamasyz etý». Qazaqstan óziniń Syrtqy ister mınıstrligi arqyly shetelderdegi azamattarymyz ben zańdy tulǵalarymyzdyń quqyqtary men múddelerin óz betinshe qorǵaýǵa kiristi. Menshikti konsýldyq qyzmet quryldy, hattamalyq jáne aqparattyq-taldamalyq qyzmettiń róli jyldam artty, sharttyq-quqyqtyq salada úlken jumys bastaldy. Vedomstvonyń jumysy reglamentteldi. Syrtqy ister mınıstrligi júıesi quryldy, oǵan ortalyq apparat, vedomstvolyq baǵynysty mekemeler men el aýmaǵyndaǵy uıymdar, dıplomatııalyq ókildikter, shetelderdegi jáne BUU-ǵa qatysýshy memleketterdegi konsýldyq mekemeler, halyqaralyq uıymdar janyndaǵy turaqty ókildikter kirdi. Jarlyq alǵash ret táýelsiz Qazaqstannyń attasheden bastap tótenshe jáne ókiletti elshige deıingi dıplomatııalyq dárejesin belgiledi.
Esh kidirissiz sheshim qabyldaýdy talap etetin eń mańyzdy másele – kadr máselesi boldy. Ol Prezıdenttiń erekshe nazarynda edi. Syrtqy ister mınıstrligine jumysqa keńestik SIM júıesinde qyzmet etken qazaqstandyqtar (olar tym az edi), sonymen qatar, shet tilderin biletin Qazaqstan JOO-larynyń túlekteri tartyldy. Qazaqstan Syrtqy ister mınıstrligine jumysqa osy maqalanyń avtory da dál solaı alyndy.
Osylaısha shırek ǵasyr buryn syrtqy saıasat salasyndaǵy jumys taqyr jerden bastalǵan edi. Al dıplomatııalyq qyzmetti jańa, kúnde ózgerip jatqan qubylmaly álemde jas memleketke laıyqty oryn qamtamasyz eterlikteı turǵyda qurý kerek boldy.
Syrtqy saıasatta atqarylǵan jumys kóp
Elbasy Táýelsizdiktiń alǵashqy kúninen bastap halyqtyń shynaıy hal-jaǵdaıyn eskerip, jas memlekettiń halyqaralyq baǵytynyń negizgi ózegin kóre bildi. Turaqty damý, ıadrolyq qarýsyzdaný jáne ony taratpaý, ekonomıkalyq ıntegrasııa, órkenıet únqatysýy, bitimgershilik, adam quqyǵy, transulttyq syn-tegeýrinderge jáne qaterlerge qarsy kúres – osynyń barlyǵy jahandyq dıskýrstyń negizgi baǵyttary edi, nátıjesinde Qazaqstan 25 jyldan keıin ózin halyqaralyq qarym-qatynastar júıesine yqpaldy qatysýshy retinde tanytty.
Syrtqy saıasat óziniń negizgi maqsaty elimizdiń ulttyq qaýipsizdigin, qorǵanys qabiletin, egemendigin jáne aýmaqtyq tutastyǵyn jan-jaqty qamtamasyz etý dep biledi. Qazaqstan Birikken Ulttar Uıymynyń ortalyq jáne úılestirýshi rólindegi jumysyn ádil jáne demokratııalyq álemdik tártip ornatýǵa baǵyttaýynan kóredi. Elimizdi óńirlik jáne halyqaralyq saýda-ekonomıkalyq qatynastar júıesine biriktirý, ulttyq ekonomıkaǵa ınvestısııalar men tehnologııalar tartý, shetelderde Qazaqstan azamattary men zańdy tulǵalarynyń quqyqtaryn qorǵaý, qazaq dıasporasy men qazaq tilin qoldaý máseleleri únemi otandyq dıplomatııanyń nazarynda.
Qazaqstan kórshiles eldermen de, shalǵaıdaǵy eldermen de dostyq, ózara tıimdi qatynas jasaı aldy. 182 memleketpen dıplomatııalyq qatynas ornatyldy.
Búkil shekaralas elder – Reseımen, Qytaımen, Qyrǵyzstanmen, О́zbekstanmen jáne Túrikmenstanmen jasalǵan shekarany mejeleý týraly, sondaı-aq, Reseı, Ázerbaıjan jáne Túrikmenstan elderimen Kaspıı teńiziniń túbin bólý týraly ekijaqty sharttarda Qazaqstan shekarasy myzǵymastyǵynyń qaǵıdasy bekitildi. Kórshiles eldermen turaqty ári boljamdy qatynas jasaý gaz jáne munaı qubyrlarynyń tarmaqtalǵan jelisin, transkontınentaldyq avtomobıl jáne temir joldaryn qalypqa keltirip, Eýrazııalyq ekonomıkalyq odaq jáne «Bir beldeý, bir jol» sııaqty tereńdetilgen ıntegrasııa men kooperasııa jobalary elimizdiń tranzıttik-kóliktik áleýetin damytýǵa kómektesti.
Elbasy Keńes ókimeti keziniń ózinde Semeı ıadrolyq synaq polıgonyn jabý týraly tarıhı sheshim qabyldap, onyń nátıjesinde elimiz dúnıe júzindegi qýaty boıynsha tórtinshi oryndaǵy raketalyq-ıadrolyq arsenaldan bas tartty. Bul sheshimder Qazaqstannyń ıadrolyq qarýsyz beıbit ómir úshin kúreske kúsh salýyna negiz boldy. 2015 jyly BUU Bas Assambleıasy bekitken Iаdrolyq qarýdan azat álem qurý týraly jalpyǵa birdeı deklarasııa; Ortalyq Azııada ıadrolyq qarýdan azat aımaq qurý; Iаdrolyq synaqtarǵa qarsy is-qımyldyń halyqaralyq kúnin jarııalaý, ıadrolyq qarýdy synaýǵa qarsy baǵyttalǵan ATOM (Abolish Testing, Our Mission – Bizdiń mindetimiz – synaqty toqtatý) jobasyn shyǵarý; Qazaqstan aýmaǵynda tómen baıytylǵan ýrandy beıbit maqsatta paıdalaný úshin álemdegi alǵashqy tómen baıytylǵan ýran bankin qurý (AEHA TBÝB) sııaqty Qazaqstan usynǵan mańyzdy bastamalar elimizdi álemge ıadrolyq qarýdy joıý jáne ony taratpaý salasyndaǵy kóshbasshy retinde tanytty.
Búgin biz BUU-ǵa jaı ǵana múshelik týraly emes, belsendi túrde ǵalamdyq deńgeıdegi kúrdeli saıası prosesterge basshylyq jasaýǵa qatysyp turǵanymyz týraly aıtyp otyrmyz. 2016 jyldyń maýsym aıynda Bas Assambleıa basym kópshilik daýyspen Qazaqstandy BUU Qaýipsizdik Keńesiniń 2017-2018 jyldarǵa turaqty emes múshesi etip saılady, bul Memleket basshysynyń halyqaralyq qaýipsizdikke, yntymaqtastyqqa jáne onyń damýyna qosqan úlesiniń aıqyn dáleli bolyp tabylady. EKSPO-2017 halyqaralyq kórmesin ótkizý jáne onyń aıasynda «Bolashaqtyń energııasy» Jasyl tehnologııa men ınvestısııalar halyqaralyq ortalyǵyn qurý Qazaqstannyń myńjyldyq maqsattardy jahandyq jáne aımaqtyq deńgeıde iske asyrýǵa qosqan naqty úlesi bolady.
Beıbit qatar ómir súrý qaǵıdasyn ustana otyryp, N.Nazarbaev 1992 jyly BUU Bas Assambleıasy 47-shi sessııasynyń minberinen alǵashqy tabysty jalpyazııalyq qaýipsizdik júıesin qurý bastamasyn – Azııadaǵy ózara is-qımyl jáne senim sharalary jónindegi keńes shaqyrý týraly bastama usyndy. Qazaqstan Ujymdyq qaýipsizdik týraly shartqa qol qoıǵan alǵashqy alty eldiń biri boldy, keıin ol qatysýshy elderdi syrtqy qaýipterden qorǵaýǵa tartylǵan Ujymdyq qaýipsizdik týraly shart uıymyn (UQShU) qurýǵa negiz qalady.
2010 jyly Qazaqstan Eýropadaǵy qaýipsizdik jáne yntymaqtastyq uıymyna (EQYU) tóraǵalyq jasap, Uıymnyń jaýapkershiligi aıasyndaǵy kúrdeli máselelerdi sheshýde, onyń ishinde Qyrǵyzstandaǵy asa tereń saıası daǵdarysty retteýde jetekshilik ról atqardy. HHI ǵasyrda Astana qalasynda alǵash jáne ázirshe jalǵyz ret ótken EQYU Sammıti Astana deklarasııasyn qabyldaýmen tarıhqa endi, onda EQYU-daǵy ózara qarym-qatynastardyń jańa deńgeıin kózdeıtin «erkin, ortaq jáne bólinbeıtin Eýro-Atlantıkalyq jáne Eýrazııalyq qaýipsizdik qoǵamdastyǵy» túsinigi engizildi.
Musylman elderinde bolyp jatqan kúrdeli geosaıası jáne ǵalamdyq syn-qaterler men saıası ózgerister jaǵdaıynda Islam Yntymaqtastyǵy Uıymynda (IYU) tóraǵalyq etý de otandyq dıplomatııanyń tarıhyndaǵy mańyzdy oqıǵalardyń biri boldy. Elimiz Azyq-túlik qaýipsizdigi boıynsha ıslam uıymyn qurýǵa bastama jasady. Qazaqstan ıslam áleminde bilim berý júıesin damytý jáne ǵylymı-tehnologııalyq turǵydan jetildirý búgingi kúni ıslam áleminiń qaýipsizdigine tóngen qaterlerge qarsy turýdyń neǵurlym tıimdi tásili dep sanaıdy. Sondyqtan 2017 jyldyń 10-11 qyrkúıeginde Astanada alǵash ret IYU-nyń Ǵylym jáne tehnologııalar jónindegi sammıtin ótkizýdi josparlaý mańyzdy fakt bolyp tabylady.
Qazaqstan tóraǵa retinde óz qyzmetin úsh ret tabysty júzege asyrǵan taǵy bir uıym – Shanhaı yntymaqtastyq uıymy (ShYU). Osy jyldyń maýsymynda memleketter basshylarynyń sammıti tabyspen ótti, onda Úndistan men Pákistan Uıymǵa tolyq quqyqty múshe memleketter retinde qabyldandy. Bedeldi ári ádil saıası bitistirýshi retinde Qazaqstan Prezıdenti Ýkraına boıynsha konsýltasııalardy jolǵa qoıýda sheshýshi ról atqardy, olar Mınsk kelisimderine ákeldi. N.Nazarbaevtyń Reseı men Túrkııa arasyn jaqyndatýdaǵy nátıjeli rólin prezıdentter V.Pýtın men R.Erdoǵan joǵary baǵalady. Qazaqstan Irannyń ıadrolyq baǵdarlamasy boıynsha eki márte nátıjeli kelissóz uıymdastyrdy. 2017 jyly BUU-nyń jáne kepilger-elderdiń qoldaýymen Astana ózin Sırııa janjalyna tartylǵandar úshin kelissóz júrgizý alańy retinde kórsetti. Jyldyń birinshi jartysynda ótkizilgen Astana prosesiniń birneshe raýndy Sırııadaǵy soǵys áreketterin toqtatý tártibin qoldaýǵa mańyzdy úles qosty jáne BUU qamqorlyǵymen Jeneva prosesiniń qaıta jańǵyrýyna kómektesti.
Qazaqstannyń 2015 jyly Dúnıejúzilik saýda uıymyna kirýi elimizdiń álemdik ekonomıka júıesimen birigýiniń sharyqtaý shegi boldy.
Búgingi kúni Astana «Bolashaqtyń energııasy» taqyrybynda ótip jatqan EKSPO-2017 halyqaralyq mamandandyrylǵan kórmesine qatysýshylardy qabyldap jatyr. 115 el jáne 22 halyqaralyq uıymnyń qatysýymen ótip jatqan bul kórme úzdik «jasyl» tehnologııalardy ǵana emes, sonymen birge, kóptegen mádenıet pen halyqty bir shańyraq astyna jınaǵan iri oqıǵaǵa aınalyp otyr.
Táýelsizdik jyldary ishinde Qazaqstan kómek resıpıentinen onyń donoryna aınaldy. Munda KazAID brendimen iske asyrylatyn damýǵa resmı kómek ulttyq baǵdarlamasyn iske qosý erekshe oryn alady. Qazirdiń ózinde osy baǵdarlama negizinde Aýǵanstanǵa jáne Ortalyq Azııadaǵy kórshiles memleketterge olardyń turaqty damý maqsatyn iske asyrý úshin, ıaǵnı resýrstyq jáne ınstıtýttyq áleýetin nyǵaıtýǵa júıeli túrde kómek kórsetilip keledi.
Astanada ár úsh jylda ótkiziletin Álemdik jáne dástúrli dinder lıderleriniń sezi órkenıet únqatysýyna salmaqty úles qosyp keledi, sonymen qatar, el ishindegi dinaralyq kelisimderge qosymsha tirek retinde qyzmet etedi, dinniń beıbitshil mánin túsindirýge kómektesedi.
Memlekettiń syrtqy saıasatynda parlamenttik dıplomatııa mańyzdy ról atqarady. Halyq qalaýlylarynyń Memleket basshysynyń syrtqy saıası bastamalaryn júzege asyrýdaǵy úlesterin joǵary baǵalaımyz. Qazaqstan búgingi kúnge deıin 30 800-ge jýyq memleketaralyq, úkimetaralyq jáne vedomstvoaralyq halyqaralyq sharttarǵa qol qoıdy.
Otandyq dıplomattar shet memlekettermen vızasyz tártip ornatý boıynsha úlken jumys júrgizip jatyr. Búgingi kúni 20 elmen vızadan bosatý týraly ekijaqty kelisim jasaldy. Buǵan qosa, 12 el birjaqty negizde qazaqstandyqtar úshin vızasyz tártip engizdi.
Jańǵyrtý basymdyqtary
«Meniń syrtqy saıasatymnyń basty qaǵıdasy – el ishinde jaqsy bılik júrgizý» degen eken HIH ǵasyrdaǵy brıtandyq memleket qaıratkeri Ýılıam Gladston.
Syrtqy saıasat vedomstvosy qyzmetiniń basty baǵyty shetel ınvestısııasyn tartý, daıyn ónimdi álemdik naryqqa baǵyttaý jolynda otandyq eksporttaýshylarǵa kómek kórsetý, ındýstrııalyq-ınnovasııalyq jobalar men «Nurly jol» baǵdarlamasyn qytaılyq «Bir beldeý, bir jol» jobasymen ushtastyryp júzege asyrýǵa yqpal etý bolyp tabylady. Bul úderiske jaqyn arada qurylǵan «KazakhInvest» jáne «KazakhExport» ulttyq kompanııalary belsendi qatysýda. Sheteldik dıplomatııalyq korpýs pen bıznes qaýymdastyq ókilderi arasyndaǵy tikeleı baılanysty damytý maqsatynda Syrtqy ister mınıstrliginiń bastamasymen, «Atameken» ulttyq kásipkerler palatasynyń qoldaýymen «Dıplomatııalyq bıznes klýby» quryldy.
Memlekettik organdardyń birlesip kúsh jumsaýynyń arqasynda 2005 jyldan bastap, 2016 jyldyń sońyna deıin Qazaqstanǵa 242 mlrd AQSh dollary kóleminde tikeleı shetel ınvestısııalary tartyldy.
SIM Astana halyqaralyq qarjy ortalyǵyn (AHQO) qurý jumystaryna júıeli qoldaý kórsetedi. Eýrazııalyq ekonomıkalyq odaq baǵyty boıynsha belsendi jumystar atqarylyp keledi. Qazirgi ýaqytta álemniń ondaǵan elderimen saýda-ekonomıkalyq yntymaqtastyqty damytý jáne EAEO erkin saýda aımaǵyn qurý boıynsha kelissózdik trekter iske qosyldy. 2018 jyly EAEO-nyń jańa Keden kodeksi kúshine enedi.
Eýrazııalyq ekonomıkalyq odaq, S5+1 amerıkalyq bastama, Eýropalyq odaqtyń Ortalyq Azııadaǵy strategııasy, «Ortalyq Azııa – Japonııa» jáne «Ortalyq Azııa – Ońtústik Koreıa» formattary máni boıynsha tıisti vektorǵa ıe. Ol – ekonomıkalyq ıntegrasııany tereńdetý jáne jańa eýrazııalyq qurylym qalyptastyrý. Bul mańyzdy aspekt basqa aımaqtyq aktorlar – Fransııa, Úndistan, Iran, Túrkııa, Pákistan jáne Saýd Arabııasynyń Eýrazııadaǵy múddelerimen tolyqtyrylady.
Memleket basshysynyń «Qazaqstannyń Úshinshi jańǵyrýy: jahandyq básekege qabilettilik» atty Joldaýy – geoekonomıkalyq aýqymdaǵy mańyzdy baǵdarlama. Ol elimizdiń Eýrazııa men tutas álem ekonomıkasyndaǵy bolashaq orny men rólin naqty aıqyndaıdy. Syrtqy ister mınıstrligi qoıylǵan mindetterdi tabysty túrde oryndaý úshin quzyretindegi barlyq resýrstardy qoldanady.
Halyqaralyq aýqymdaǵy iri mindet – «Jahandyq álemdegi zamanaýı qazaqstandyq mádenıet» jobasyn júzege asyrý. «Bolashaqqa baǵdar: rýhanı jańǵyrý» maqalasynda Elbasy tarapynan berilgen tapsyrmalarǵa sáıkes, úkimet ádebıet, dramatýrgııa, opera, balet, mýzyka, kıno, beıneleý óneri, músindeý salasyndaǵy zamandas otandastyrymyz dúnıege ákelgen biregeı týyndylardy nasıhattaýǵa kúsh-jigerin jumsaıdy.
Ýaqyt Qazaqstannyń halyqaralyq qyzmetiniń kóp vektorlyǵy, pragmatızm jáne ulttyq múddelerdi berik qorǵaý sııaqty negizgi qaǵıdalarynyń durystyǵyn kórsetti. Buǵan qosa, qubylmaly jaǵdaılardy eskerip, olarǵa ýaqtyly beıimdelý, syn-qaterlerge tıimdi jaýap qaıtarý óte mańyzdy. 2014-2020 jyldarǵa arnalǵan «Qazaqstan Respýblıkasynyń Syrtqy saıasat tujyrymdamasyn» basshylyqqa ala otyryp, biz elimizdiń damýyn, qaýipsizdigin jáne azamattarymyzdyń ıgiligin qamtamasyz etý úshin barynsha qolaıly syrtqy jaǵdaılardy qalyptastyrýǵa jaǵdaı jasaýdy jalǵastyra beremiz.
SIM ınstıtýttyq damytý jumystary jalǵastyrylady, sonyń ishinde onyń qoǵammen birlesken is-qımylyn nyǵaıtýǵa da laıyqty kóńil bólinedi. Mınıstrlik janynda Qoǵamdyq keńes qyzmet etedi, onyń quramyna Parlament depýtattary, bedeldi dıplomattar, belgili qoǵam qaıratkerleri, ǵalymdar men jýrnalıster kiredi. 2013 jyly mınıstrlik janynan «Adam ólshemi boıynsha suhbat alańy» konsýltasııalyq-keńes organy quryldy. SIM qyzmetkerleri men dıplomatııalyq qyzmet ardagerleriniń kúsh-jigerimen «Qazaqstandyq dıplomattar birlestigi» qurylyp, jumys jasaýda.
Táýelsizdik jyldary ishinde mınıstrlikte teńdessiz halyqaralyq jáne dıplomatııalyq tájirıbesi bar qyzmetkerlerdiń kásibı kadrlyq quramy qalyptasty. Kóptegen mamandar «Bolashaq» prezıdenttik stıpendııasynyń arqasynda shetelde bilim alyp keldi.
Shırek ǵasyrda 285 azamatymyz Qazaqstan Respýblıkasynyń shetelderdegi tótenshe jáne ýákiletti elshisi qyzmetine taǵaıyndalý qurmetine ıe boldy. Otandasymyz Qasym-Jomart Toqaev BUU Bas hatshysynyń orynbasary – BUU Jenevadaǵy bólimshesiniń Bas dırektory laýazymyn, Qanat Saýdabaev – EQYU-nyń Is basyndaǵy tóraǵasy, Bolat Nurǵalıev – Shanhaı yntymaqtastyq uıymynyń Bas hatshysy, Taıyr Mansurov – Eýrazııalyq ekonomıkalyq qoǵamdastyqtyń Bas hatshysy, Ashat Orazbaı Ekonomıkalyq yntymaqtastyq uıymynyń Bas hatshysy laýazymdaryn atqardy.
Otandyq dıplomatııa tarıhyna táýelsiz Qazaqstannyń barlyq Syrtqy ister mınıstrleriniń attary altyn árippen jazyldy. Olar – Aqmaral Haıdarqyzy Arystanbekova, Tóleýtaı Ysqaquly Súleımenov, Qanat Bekmyrzauly Saýdabaev, Qasym-Jomart Kemeluly Toqaev, Erlan Ábilfaıyzuly Ydyrysov, Marat Muhanbetqazyuly Tájın, Erjan Hozeuly Qazyhanov.
Qazaqstandyq dıplomattardyń qazirgi býynynyń otandyq syrtqy saıasattaǵy alǵashqy maıtalmandardyń isin laıyqty jalǵastyratynyna senimdimin.
Men úshin, ásirese, osyndaı aıtýly mereıtoı jyly syrtqy saıasat vedomstvosyn basqarý úlken mártebe. Meniń jáne SIM júıesiniń barlyq ujymynyń aldynda Elbasynyń úlken senimin aqtaý jáne aldymyzǵa qoıylǵan mańyzdy maqsattardy laıyqty atqarý mindeti tur.
Qaırat Ábdirahmanov,
Qazaqstan Respýblıkasynyń Syrtqy ister mınıstri
