Aldymen sóz alǵan Astanadaǵy «Otyrar kitaphanasy» ǵylymı ortalyǵynyń jetekshisi, jazýshy Tursyn Jurtbaı sózdiń saýdaǵa aınalyp otyrǵandyǵy jaıynda tolǵandy. Memleket basshysy N.Nazarbaevtyń «Bolashaqqa baǵdar: rýhanı jańǵyrý» atty maqalasynda aıtylǵan ulttyq kodymyzdy bilý ýaqyt talaby ekendigine toqtaldy.
Bilim men ǵylym salasyndaǵy máseleler de nazardan tys qalǵan joq. Bilim salasy týraly aıtqanda, mektepte eńbek sabaǵynan sendvıchti qalaı daıyndaý kerek degen as mázirin ázirleý sabaqtarynyń bolýy bala sanasynyń batystyq qundylyqtarǵa beıimdelýine jol ashatyndyǵy basa aıtyldy.
Sharany úılestirip otyrǵan Aqmola oblysy Qazaqstan halqy Assambleıasy hatshylyǵynyń meńgerýshisi Maral Jaqypova Elbasy óz maqalasynda maqsatqa jetýdiń joly sana isten alda bolýy kerektigin eskertkendigine nazar aýdardy. Bul rette Birtutas ult bolý úshin nendeı qadamdar jasaý kerektigi jáne buqaralyq sanany qalaı ózgertýge bolary da anyq jazylǵan. Olaı bolsa, taıaý jyldary atqarylýǵa jatatyn mindetterdiń qatarynda «Qazaqstan-2050» Strategııasyndaǵy «2025 jyldan bastap latyn álipbıine kóshýimiz kerek» degen mindetti iske asyrý joldary; jalpyulttyq patrıotızmniń ózegi bolyp tabylatyn «Týǵan jer» baǵdarlamasy; «Jańa gýmanıtarlyq bilim. Qazaq tilindegi 100 jańa oqýlyq»; «Qazaqstannyń kıeli jerleriniń geografııasy»; «Jahandaǵy zamanaýı qazaqstandyq mádenıet» jáne «Qazaqstandaǵy 100 jańa esim» atty jobalardy júzege asyrý kútip turǵandyǵymen bólisti. Sondyqtan da, bul mindetter barsha qazaqstandyqtardyń birlese atqarýy tıis dep sanalady.
Kókshetaý qalasynyń qurmetti azamaty, Aqmola oblysy Qazaqstan halqy Assambleıasynyń múshesi Vıktor Tereshýk óz kezeginde Ýkraınadaǵy jaǵdaıdy mysal retinde keltirdi. Árbir sala boıynsha jumys isteý mádenıetin qalyptastyrý qajettigi turǵysynda oı qozǵaǵan ol bul jaǵynan áli de artta qalýshylyq bar ekendigin atady.
Jalpy, talqylaý barysynda Elbasynyń maqalasynan týyndaıtyn mindetterge qatysty kóptegen jaıt aıtyldy. Talqylaý barysynda suraqtar qoıylyp, spıkerler oǵan tııanaqty jaýaptar berdi. Qaıshylyqtardy eńserýdiń joly da atalmaı qalǵan joq. Olaı bolsa, Elbasynyń maqalasy Qazaqstan qoǵamyn ári qaraı jyljytýda basty baǵdar bolyp tabylatyny jetkizildi.
Asqar TURAPBAIULY,
«Egemen Qazaqstan»
Aqmola oblysy
