Osyndaǵy jol boıyndaǵy bulaq basyn qýalap qonǵan «Jińishke» aýyldyq okrýgindegi «Nur-Aıdar» sharýa qojalyǵy úsh jyldan beri asa dárýmenderge baı tańqýraı ósirip keledi. Áýelde bári eksperımentten bastalady ǵoı. Erkin Sherálıev degen azamat tańqýraıdyń paıdasy, onyń taýly jerge jaqsy ósetindigin bilgennen keıin ósirý joldaryn ábden zerttep úı irgesindegi 7 sotyq jerine egip kórgisi keledi.
Kókónistiń basqa túrin ósirip jatqandar kóp, al tańqýraıǵa mamandanǵandar az. Paıdasyn da esepteı bermeıdi. Bul Erkinge qol bolǵan. 7 sotyq jerden birtalaı nesibe aıyrǵan soń 3 gektar sýarmaly jerdi 49 jylǵa nesıege alyp, taǵy da tańqýraı ekken. Osylaısha, bitik ónimnen kún saıyn 200 kıloǵa deıin jınaıtyn bolǵan.
– Tańqýraıdyń kılosyn 700 teńgeden satyp jatyrmyz. Bul jemis daqylynyń ár túbi 2-3 kılodan ónim beredi. Al maýsymynda 1 gektardan 12 tonnaǵa deıin jemis jınaýǵa bolady. Jıyn-terim jumystaryna 20-ǵa jýyq aýyl turǵyndary tartylyp, árqaısysyna kúnine bir kılo terse 150 teńgeden aqy tólep jatyrmyz. Jumysshylardyń tamaǵy tegin. Mundaǵy jumysshylar kúnine orta eseppen 2000-3000 teńgeniń kóleminde aqsha tabady, – deıdi qojalyq tóraǵasy Erkin Sherálıev.
Negizinen tańqýraı butaly kópjyldyq ósimdik sanalady. Jabaıy túrde azǵana bolsa da kóleńkeli jerde jaqsy ósedi. Osyny eskergen qojalyq aýyl irgesindegi qyratty aýmaqty arnaıy tańdapty. Qojalyq aldaǵy ýaqytta jemis kólemin 1,5 gektarǵa ulǵaıtamyn dep otyr. Sharýanyń jumys josparyna razy bolǵan oblys ákimi Janseıit Túımebaev aýdan basshylyǵyna Qazyǵurt aýdanyndaǵy taýly aýyl okrýgterinde tańqýraı plantasııalaryn ulǵaıtýdy tapsyrdy.
Jaqsy jańalyq jýrnalısterdiń jazbasy, túsirilimi arqyly Ońtústiktiń barlyq aýdan, qalalaryna tez tarap ketti. Ońtústik dıhandary ózge óńirlerge qaraǵanda, eńbekqorlyǵymen erekshelenedi. Endi olardyń bir toby tańqýraı ósirýdiń qyr-syryn úırený úshin «Nur-Aıdar» sharýa qojalyǵy men óziniń mekeniniń arasyn aıdaý jolǵa aınaldyryp jiberdi.
