Osyǵan oraı respýblıka halqy tyǵyz ornalasqan ońtústik aımaqtardan kóship kelýshilerdi ornalastyrýdyń, jumyspen, baspanamen qamtamasyz etýdiń jergilikti baǵdarlamasy jasalyp, jyl aıaǵyna deıin 600 otbasyn qabyldaý josparlanǵan. Qazir 78 otbasyǵa memlekettik qarjylaı kómek kórsetilgen. Byltyr kvotadaǵy 110 otbasynyń ornyna 130 otbasy qabyldanǵan bolatyn.
Oblystyq jumyspen qamtýdy úılestirý jáne áleýmettik baǵdarlamalar basqarmasynyń basshysy Sergeı Iаkovenkonyń aıtýynsha,
óńirlerden kóship kelýge nıetti adamdarǵa teriskeıde bir myńǵa jýyq bos jumys orny qarastyrylyp otyr. 13 aýdanda 700-deı úı ázirlengen. Birinshi kezekte muǵalimderge, dárigerlerge, jumysshy mamandyqtaryna qatty zárýlik baıqalady.
Jumyspen qamtý jobasy aıasynda óńiraralyq eńbek naryǵyn damytýǵa belsene qatysyp, jeke sharýashylyǵyn urshyqsha úıirip júrgenderdiń biri – Sheralıevter otbasy. «Begalıev Akbaraly» jeke kásipkerliginde eńbek etetin Iýsýbáli byltyr otbasymen Qyzyljar aýdanynyń Sokolov aýylyna kóship kelgen. Qazir bul áýletten segiz adam 5,5 gektar jerge kókónis ósirýmen aınalysady. Byltyrǵydaı bıyl da shyǵym jaqsy. Jıyn-terim aıaqtalǵannan keıin úsh jylyjaıdyń qurylysyna kirispek oılary bar.
– О́tken jyly Ońtústik Qazaqstan oblysynan 16 otbasy, bıyl 7 otbasy kóship keldi. Shańyraq ıesine 50, otbasy múshelerine 35 aılyq eseptik kórsetkish kóleminde bir rettik járdemaqy tólendi. Budan tysqary kommýnaldyq tólemder men jalǵa alý shyǵyndary da óteledi, – dedi óz áńgimesinde Qyzyljar aýdandyq jumyspen qamtý ortalyǵynyń dırektory Raýshan Tákibaeva.
Ońtústik jaqtan qonys aýdarýshylardyń kásibi men násibin qatar alyp júrýine jan-jaqty qamqorlyq jasap júrgen «Mámbetov jáne K» komandıttik seriktestiginiń bas dırektory Erkebulan Mámbetov Saryaǵash aýdanynan kelgen Ǵanı Júsipbekovtiń eńbekqorlyǵy men tyndyrymdylyǵyna dán rıza. Otaǵasyǵa da, otanasyna da jumys taýyp berip, baspana, mal satyp ápergen. Otyny, shóbi úıýli. Tuńǵyshtary birinshi synypqa barsa, kishisi balabaqshada. Soltústiktiń qytymyr aýa raıyna úırenip qalǵan olar kartop ósirip, nesibelerin aıyryp otyr. Erkebulan Nurmaǵambetuly 3 mıllıon teńge jeńildikti nesıe resimdep, jeke sharýashylyǵyn ashýǵa da járdemdesipti.
Jýyrda Mamlıýt aýdanynyń Lenın eldi mekenine Jambyl oblysynyń Qordaı aýdanynan dúngen aǵaıyndardyń 13 otbasy ornalasyp, olar kele salysymen birden jer óńdeýge kirisip ketti. Bárinen de oqýshylary azaıyp, jabylý qaýpi tónip turǵan mekteptiń saqtalyp qalǵany súısintedi.
Kúngeı jurtyn teriskeıge qonystandyrý baǵdarlamasynyń oryndalýy aımaq basshylyǵynyń jiti nazarynda tur.
О́mir ESQALI,
«Egemen Qazaqstan»
Soltústik Qazaqstan oblysy
