Almaty qalasy ákimdigi jáne «Qazaqfılm» AQ qoldaýymen iske asyp kele jatqan ıgi is osymen jıyrmasynshy ret uıymdastyrylyp otyr. Qaıyrymdylyq kórsetilimdi tamashalaýǵa kelgen júz qonaqtyń júzderi jadyrap búgingi sharadan rýhanı nár alyp qaıtty. Ulttyq ónerdi nasıhattap, dástúrli ónerdi damytý maqsatynda ashylǵan teatrdyń kınozalynda otandyq kınotýyndylarǵa erekshe basymdyq berilgen. Uıymdastyrýshylar bul kórsetilimniń basty maqsaty qarııalarǵa kóterińki kóńil kúı syılaýmen qatar, óskeleń urpaqty qaıyrymdylyqqa, úlkendi qurmetteýge, jaqsylyq jasaýǵa shaqyrý ekenin aıtady.
– Dana halqymyz «Qaltyldaıdy eken dep qarttyqty sókpe, bárińniń barar jeriń sol» dep tegin aıtpasa kerek. Úlkenge qurmet kórsetý babamyzdan jalǵasyp kele jatqan, qanymyzǵa sińgen qasıet. Ony joǵaltyp almaý, urpaqtan-urpaqqa jetkizý bizdiń boryshymyz. Búgingi sharada bas qosqan qarııalar bir-birimen shúıirkelesip, oılaryndaǵysyn ortaǵa salyp kóńildenip qaıtty. Olardyń júzderinen jylylyq kórgende bizdiń de kóńilimiz kókjıekke kóteriledi. Sebebi, qarttar da bala sııaqty. Ásirese, kún sanap sany azaıyp saptan shyǵyp jatqan ardager atalarǵa, tyl ardagerlerine moraldyq qoldaý bildirý aýadaı qajet. Memleketimiz ol kisilerge únemi qamqorlyq tanytyp keledi. Sol dástúrdi jalǵap jastarǵa úlgi etýimiz kerek, – deıdi «Alataý» dástúrli óner teatry kınobóliminiń jetekshisi Rıta Halelqyzy.
Shara sońynda qarııalar uıymdastyrýshylarǵa shynaıy rızashylyǵyn bildirip, elimizdiń mártebesi asqaqtap, keler urpaqtyń bolashaǵy jarqyn bolýyn tilep tarqasty. Úlkenge qurmet kórsetý kishiniń mindeti. Qazynaly qartyn syılaǵan eldiń bolashaǵy qaı kezde de dańǵyl bolmaq. Qarttarǵa demeý, urpaqqa úlgi bolarlyq osyndaı ıgi isterdiń kóptep ótýi kóńil qýantady.
Arman OKTIаBR,
«Egemen Qazaqstan»
ALMATY
