Aıtalyq, 1-10-synyp oqýshylary arasyndaǵy jazǵy lagerlerde elimiz boıynsha 1 mln 655 bala demalypty. Bul barlyq oqýshylardyń 61 paıyzy deýge bolady. Sonymen qatar, 600-den astam olımpıadalyq mektep, 2 myń tildik mektep, 10 myń shyǵarmashylyq ortalyq, 14 myń sporttyq-týrıstik baǵyttaǵy uıym, 15 myń eńbek jáne demalys ormanshylyq lagerleri men toptary jumys isteýde. Jalpy, memleketimiz boıynsha ústimizdegi jyly 85 paıyz nemese áleýmettik osal otbasylarda ómir súrip jatqan 429 myń bala saýyqtyrý oryndarynda bolǵan.
Otanymyz boıynsha júzdegen shaǵyn lager bar ekeni belgili. Sonyń ishinde táýelsiz elimizdiń artegi retinde baǵalanyp otyrǵan «Baldáýren» respýblıkalyq oqý-saýyqtyrý ortalyǵynyń jóni bólek. Bul keshende balalardy belsendi azamattyq ustanymǵa, olardyń shyǵarmashylyq qabiletterin ashyp, jeke tulǵa retinde qalyptasýyna, ómirdegi óz ornyn durys tańdaýyna barlyq múmkindik jasalǵan. «Býrabaı» memlekettik ulttyq tabıǵı parki aýmaǵynda, Shortandy kóliniń jaǵalaýyna ornalasqan bul mekeme jyl boıy oqýshylardyń demalysy men oqýyn ushtastyra otyryp júrgizedi. Aýysym uzaqtyǵyna keler bolsaq, jaz mezgilinde oqýshylar – 15 kún, sabaq ýaqytynda – 20 kún bolady.
Ortalyq tarapynan beriletin úılestirilgen 5 ret tamaqtanýdyń ózindik biregeı ereksheligi bar. Barlyq ónimder tabıǵı, dárýmenderge baı jáne tipti ishinara ortalyqtyń aýmaǵynda ósiriledi. Keshenniń besinshi qabatynda tolyq jabdyqtalǵan bólmeler bar. Onda bir mezgilde 350 demalýshynyń turýyna múmkindik qarastyrylǵan.
Elimizde iri «Baldáýren» sekildi keshender uıymdastyrý, tipti sol keshenderdi «Baldáýrenniń» bólimshesi retinde bekitý máselesin bas basylym áldeneshe ret kótergen edi. Eger bul ıgilikti is óz sheshimin taýyp jatsa, táýelsiz eldiń artegi qalyptasar edi. Jergilikti jerlerdegi lagerlerden talanttardy «Baldáýren» – qazaq artegine jiberý úrdisi úılesim taýyp, mıllıondaǵan balalardyń ishinen naǵyz myqtylar sonda barýǵa talpynary kúmánsiz.
Qazir osy «Baldáýrenniń» bir bólimshesi Almaty oblysynyń aýmaǵynan – «Baldáýren-Qapshaǵaı» baqytty balalyq shaq mekeni eki jyldan beri jumys istep keledi. Bul sol óńirdegi oqýshylardyń demalýyna mol múmkindik berýde. Qazirdiń ózinde lager zamanaýı qural-jabdyqtarmen tolyq jaraqtalǵan. Jıyrma myń kitap qory bar kitaphana ashylǵan. Balalardyń shyǵarmashylyq qabiletin arttyrý maqsatynda sheberhana, stýdııa, úıirmeler, kompıýterlik synyptar jumys isteıdi. Aıtalyq, bıylǵy jazdyń negizgi taqyryby EKSPO-2017-ge arnalypty.
Elimizdegi mıllıondaǵan ul men qyzdyń jazǵy demalysyn uıymdastyrý isin áli de jetildire bersek, urpaǵymyzdyń mektep tabaldyryǵyn kóńildi attap, jyl boıy bilim nárimen sergek sýsyndary sózsiz. Lager alaýy – bala qalaýy deýimizdiń máni osynda jatyr.
Súleımen Mámet,
«Egemen Qazaqstan»
