4 tamyzǵa deıin jalǵasatyn BQO kúnderi aıasynda Qabanbaı batyr dańǵyly boıyndaǵy etnoaýylda oblystyq tarıhı-ólketaný mýzeıi kelýshilerdi óz eksponattarymen tanystyrsa, oblystyq halyq shyǵarmashylyǵy ortalyǵy «EKSPO-2017 - álem kórmesine saıahat» atty sándik qoldanbaly qolóner sheberleri men Aq Jaıyq óńiri sýretshileriniń kórmesin uıymdastyrdy.
Batysqazaqstandyq jýrnalıst Nurtaı Tekebaev málim etkenindeı, mýzeı jádigerleri qoıylǵan kıiz úılerdiń ishinde «Altyn hanshaıym» ekspozısııasy, Qurmanǵazy dombyrasynyń kóshirmesi, Á. Qasteevtiń 1941 jyly salǵan «Tólegen men Qyz Jibektiń kezdesýi» atty kartınasy, Jáńgir han mýndıriniń, onyń jary Fatıma hanymnyń saltanatty keshte kıetin kóıleginiń kóshirmeleri, Bókeı ordasy tarıhı-mýzeı kesheniniń úlgisin kórýge bolady. Sonymen qatar mýzeı qorynan alynǵan oblys aýmaǵyndaǵy Lebedevka, Qyryqoba qorǵandarynan tabylǵan arheologııalyq qazba materıaldary, altyn japsyrmalar, at ábzelderi, zergerlik buıymdardyń mol jıyntyǵy, óńir tarıhyna qatysty qundy qujattar bar. 400-ge jýyq mýzeı jádigeri kelýshilerdiń nazaryna usynyldy.
Oblystyq halyq shyǵarmashylyǵy ortalyǵynyń mamany Batyrhan Qaıyrovtyń sózine qaraǵanda, etnoaýyldaǵy kórmege Batys Qazaqstan oblysynan kelgen 21 qolóner sheberi qatysýda. Kórme barysynda Nurbol Ámirjanov keramıkadan ydys jasaýdan sheberlik saǵatyn kórsetti. Shyńǵyrlaý aýdanyndaǵy «Marfýǵa» tigin sehynyń ıesi Ásel Sultanǵalıeva qyz jasaýyna qatysty ónimderdi ala kelipti. Aqjaıyq aýdanynyń turǵyny Erlan Bektenovtiń zergerlik buıymdary respýblıka kólemine keńinen tanymal. Oral qalasyndaǵy «Women Art Dızaın» kompanııasy ulttyq buıymdar galereıasyn jabdyqtaǵan. Shyǵarmashylyq toptyń quramynda Qazaqstan Dızaınerleri odaǵynyń músheleri Raısa Alekseeva, Marına Ermekqalıeva, Natalıa Brıks bar. 2012 jyly Seýl qalasynda ótken halyqaralyq sammıtte Elbasymyz «Women Art Dızaın» daıyndaǵan tumardy sol kezdegi AQSh prezıdenti Barak Obamaǵa syıǵa tartqan. Oraldyq «Tekemet» jeke seriktestesigi de atalǵan kompanııa sekildi shetelderde kórmeler uıymdastyryp úlgergen. Bir aıta ketetin jaıt, kórmege qatysyp jatqan kásipkerler óz buıymdaryn sattyqqa qoıa alady.
Etnoaýylda Qostanaı oblysynyń qolóner sheberleri de bar. Olar batysqazaqstandyq toppen shyǵarmashylyq baılanys jasaýda.
Aıta keteıik, «EKSPO-2017» halyqaralyq kórmesi aıasynda Astanada BQO-nyń mádenıet kúnderin ótkizýge 111,8 mln teńge bólingen. Oblystyń mádenıet jáne óner ujymdary Elordada 10 konserttik baǵdarlama men 8 spektakldi kórermender nazaryna usynady. Sonymen qatar «Qazanat» ıppodromynda 3-4 tamyz kúnderi kókpar, teńge ilý, aýdaryspaq, jamby atý jáne qyz qýýdan ulttyq sport oıyndary uıymdastyrylmaq. BQO kúnderi 4 tamyz kúni «EKSPO-2017» alańyndaǵy amfıteatrda óner ujymdarynyń gala-konsertimen támamdalmaq.
